Angliya Premer-ligasining yangi chempioni – “Liverpul” bosh murabbiyi Arne Slot jamoaning g‘alabasi va kelgusi rejalari haqida fikr bildirar ekan, transfer siyosati va uning ahamiyatiga alohida to‘xtalib o‘tdi. “Feyenoord” bilan ajoyib natijalar qayd etganidan so‘ng “qizillar”ni qabul qilib olgan niderlandiyalik mutaxassis Yurgen Kloppdan keyingi bosimli lavozimni munosib egalladi.
Arne Slot o‘zining APLdagi debyut mavsumidayoq jamoani chempionlikka olib chiqishga erishdi va bu bilan klub rahbariyati va muxlislar ishonchini oqladi. Uning jamoa o‘yiniga kiritgan taktik yondashuvi, futbolchilarni to‘g‘ri boshqarishi va psixologik tayyorgarlikdagi yutuqlari mutaxassislar tomonidan yuqori baholanmoqda.
Biroq murabbiy o‘zining g‘alabali natijasiga qaramay, “Liverpul”ning yanada kuchliroq bo‘lishi uchun yozda tarkibni yaxshilash zarurligini ta’kidladi:
“Yozgi transfer oynasida jamoamizga kaminasida bitta-ikkita yangi va samarali “qurol”ni qo‘shishni istayman. Buni transferlar orqali amalga oshirishimiz mumkin. Bizda kuchli futbolchilar bor, ammo yanada yuqori maqsadlarga intilmoqda ekanmiz, raqobatbardosh tarkibga ega bo‘lishimiz zarur.”
Slot bu fikrlari orqali “Manchester Siti”ni misol sifatida keltirdi. Xosep Gvardiola qishki transfer oynasida tarkibga katta o‘zgarishlar kiritdi va bu natijalarga jiddiy ta’sir qildi. Jumladan, Abduqodir Husanov, Umar Marmush, Niko Gonsales va Vitor Reysning kelishi “shaharliklar”ga ikkinchi davrada qayta tiklanish imkonini berdi.
Xususan, Abduqodir Husanovning himoyadagi yorqin o‘yinlari natijasida jamoa ko‘plab muhim ochkolarni yo‘qotmasdan safarbar bo‘ldi. U fevral oyida “Siti”ning eng yaxshi futbolchisi sifatida tan olindi.
Niko Gonsales va Umar Marmush ham jamoaning markaz va hujum chizig‘idagi muammolarini biroz yumshatishga yordam berishdi.
Slot so‘zlarining yakunida ta’kidladiki, har qanday murabbiy uchun transferlar – bu faqat kerakli ijrochilarni emas, balki g‘alabalarni ta’minlash uchun strategik quroldir.
Zamin.uz tahririyati “Liverpul”ning yozgi transfer harakatlarini, Slotning yangi qurollari kimlar bo‘lishini diqqat bilan kuzatadi. Sizcha, Slot “qizillar”ni uzoq yillar davomida raqiblardan ustun qilib tura oladimi?
