Angliyaning “Manchester Siti” klubi bosh murabbiyi Xosep Gvardiola joriy mavsum yakunlangach, jamoani tark etishni rejalashtirmoqda va boshqa klublardan taklif kutmoqda. Bu haqda Footmercato jurnalisti Xosep Pedrerolning xabariga tayanib Daryo ma'lum qildi.
Manbaga koʻra, ispaniyalik murabbiy Angliya Premer Ligasidan ketishni oʻtgan yilning yozida oʻylagan. Gvardiola Angliya terma jamoasini boshqarishni rejalashtirgan edi, biroq bu lavozimga nemis mutaxassisi Tomas Tuxel tayinlangan.
Shu sababli “shaharliklar” ustozi boshqa variantlar qolmagach “Manchester Siti”da qolishga qaror qilgan. Jurnalistning ta'kidlashicha, Xosep oʻz rejasidan voz kechmagan va baribir “Manchester Siti” bilan uzoq yillik faoliyatdan soʻng xayrlashish niyatida.
Gvardiola shogirdlari soʻnggi uchrashuvda “Real Madrid”ga 1:3 hisobida yutqazib, Chempionlar Ligasini tark etgandi.
“Manchester Siti” navbatdagi uchrashuvni ertaga, 23 fevral kuni “Liverpul”ga qarshi oʻtkazadi. Jamoa 25 uchrashuvdan soʻng 44 ochko toʻplab, APL turnir jadvalida 4-oʻrinda bormoqda.
