Futbol muxlisliri orasida mashhur bo‘lgan xalqaro statistik platforma — Flashscore Jahon chempionati–2026 saralash bosqichi oldidan har bir qit’adagi eng muhim bahslar va jamoalarning imkoniyatlari haqida tahliliy maqola e’lon qildi. Unda Osiyo mintaqasidagi jarayonlarga, xususan, “A” guruhiga alohida e’tibor qaratilgan.
Nashr yozishicha, Eron terma jamoasi bu guruhdan final bosqichiga allaqachon yo‘llanma olgan bo‘lsa, O‘zbekiston esa o‘z tarixida ilk bor Jahon chempionatida ishtirok etishga juda yaqin turibdi.
“Abu-Dabida uchinchi o‘rinda borayotgan Birlashgan Arab Amirliklariga qarshi safarda mag‘lub bo‘lmaslik — o‘zbekistonliklar uchun tarixiy muvaffaqiyat eshigini ochishi mumkin. Agar Timur Kapadze shogirdlari kamida durang qayd etsa, Markaziy Osiyo mamlakati Jahon chempionati finaliga chiqadi,” — deya ta’kidlaydi Flashscore tahlilchilari.
Qatarning imkoniyatlari cheklangan
Shuningdek, maqolada joriy Osiyo chempioni — Qatar terma jamoasi haqida ham fikr bildirilgan. Aytilishicha, jamoaning maksimal ko‘rsatishi mumkin bo‘lgan natijasi — uchinchi yoki to‘rtinchi o‘rin bo‘lishi mumkin. Bu esa ularni keyingi saralash bosqichiga olib chiqishi mumkin, xolos.
Qatar so‘nggi ikki turda avvalo Eronni qabul qiladi, so‘ngra esa O‘zbekistonga safar uyushtirishi kerak bo‘ladi. Flashscore ta’kidlashicha, katta xalqaro tajribaga ega mutaxassis — "Vest Xem", "Real Madrid" va Ispaniya terma jamoasining sobiq ustozi Xulen Lopetegi endi Qatar termasi bosh murabbiyi sifatida ish boshlagan.
Xulosa:
Osiyo qit’asidagi saralash jarayonlari tobora qizg‘in pallaga kirib bormoqda. Flashscore'ning tahliliga ko‘ra, O‘zbekiston terma jamoasi o‘z tarixidagi eng katta bosqich ostonasida turibdi. Endi hammasi Abu-Dabida kechadigan hal qiluvchi bahsga bog‘liq. Milliy jamoamizga Jahon chempionati yo‘llanmasi uchun omad tilaymiz!
👍 0❤️ 0😂 0😢 0😡 0
