UEFA Millatlar ligasi yarim final bosqichidan o‘rin olgan katta to‘qnashuv — Germaniya va Portugaliya terma jamoalari o‘rtasidagi bellashuv o‘z yakuniga yetdi. Bavariyadagi "Allianz Arena" stadionida 75 mingdan ortiq tomoshabin guvoh bo‘lgan ushbu tinimsiz va shiddatli o‘yinda portugallar Germaniya ustidan 2:1 hisobida zafar quchishdi.
Bellashuvning birinchi bo‘limida har ikki jamoa ehtiyotkorlik bilan harakat qildi va gol urilamandi. Ammo ikkinchi taym boshlanishi bilan to‘plar kirish seriyasi boshlandi.
48-daqiqada Germaniyaning yosh yulduzi Florian Virs hisobni ochdi va o‘z jamoasini oldinga olib chiqdi. Ammo portugallar javobsiz qolmadi.
63-daqiqada Fransisko Konseysau vaziyatni tenglashtirsa, ortidan 68-daqiqada portugal futbolining ramziy figurasi — Krishtianu Ronaldu g‘alabali golni urdi va Portugaliyani Millatlar ligasi finaliga yetakladi.
Ronalduning bu goli nafaqat jamoasiga yo‘llanma olib keldi, balki uning milliy jamoa safidagi yana bir muhim tarixiy lahzasini qayd etdi.
Shu bilan Portugaliya 8 iyundan 9 iyunga o‘tar kechasi, Toshkent vaqti bilan soat 00:00da start oladigan Millatlar ligasi finalida maydonga tushadi. Qarshi tomon esa Ispaniya – Fransiya uchrashuvidan keyin aniq bo‘ladi.
Germaniya esa musobaqaning uchinchi o‘rin uchun bahsida ishtirok etadi. Ular 7 iyundan 8 iyunga o‘tar kechasi o‘z imkonini sinovdan o‘tkazadi.
Portugaliya terma jamoasi yana bir bor o‘z salohiyati va xarakterini namoyish etib, qiyin o‘yinda yirik raqib ustidan muhim g‘alabani qayd etdi. Endi barcha nazarlar finalga qaratiladi — Ronaldu boshchiligidagi Portugaliyaning navbatdagi raqibi kim bo‘ladi? Javob yaqin soatlarda ma’lum bo‘ladi.
