Futbolchilarning bozor qiymatini baholash bo‘yicha eng nufuzli manbalardan biri — Transfermarkt portali Rossiya chempionatlarida to‘p surayotgan futbolchilarning transfer bahosini yangiladi. Yangilangan ro‘yxatda Rossiya Premer-ligasi va Birinchi ligada harakat qilayotgan futbolchilarning qiymati qaytadan baholandi.
Ayniqsa, markaziy osiyolik futbolchilar orasidagi reyting katta qiziqish uyg‘otdi. Unga ko‘ra, Moskvaning SSKA klubi safida o‘ynayotgan o‘zbekistonlik yarim himoyachi Abbos Fayzullayev 8 million yevrolik qiymat bilan reytingni boshqarib turibdi. Bu raqam nafaqat u uchun shaxsiy rekord, balki butun mintaqa futbolchilari uchun ham mutlaq yuqori ko‘rsatkich sanaladi.
Markaziy Osiyo futbolchilari orasidagi top-5:
1. Abbos Fayzullayev (O‘zbekiston, SSKA) — 8 million yevro
2. Nurali Alip (Qozog‘iston, «Zenit») — 3 million yevro
3. Maksim Samorodov (Qozog‘iston, «Axmat») — 2,5 million yevro
4. Rustam Yatimov (Tojikiston, «Rostov») — 1,5 million yevro
5. Rustam Ashurmatov (O‘zbekiston, «Rubin»)
Guljigit Aliqulov (Qirg‘iziston, «Torpedo») — har biri 600 ming yevro
Rossiya chempionatidagi eng qimmat futbolchilar:
Rossiya chempionatining umumiy transfer ro‘yxatida 25 million yevroga baholangan Eduard Spersyan («Krasnodar») va Luis Enrike («Zenit») yetakchilik qilishmoqda. Kuchli uchlikni braziliyalik yarim himoyachi Vendel («Zenit», 18 million yevro) yakunlab beradi.
Abbos Fayzullayevning transfer qiymatining bu darajada o‘sishi — uning Rossiya Premer-ligasidagi yorqin o‘yinlari, barqaror natijalari va potensialining xalqaro darajadagi salohiyatini namoyon etmoqda. Bu holat o‘z navbatida, markaziy osiyolik futbolchilarning Yevropaga yo‘l ochishida muhim omil bo‘ladi.
O‘zbekiston futbolchilari uchun esa bu natija — yangi bosqichga ko‘tarilishga ilhom manbai.
👍 0❤️ 0😂 0😢 0😡 0
