Skaloni: Argentina — Kolumbiya uchrashuvi jamoam uchun imtihon bo‘ldi
2026 yilgi Jahon Chempionati saralash bahslari qizg‘in pallada davom etmoqda va so‘nggi turdagi markaziy o‘yinlardan biri Argentina va Kolumbiya terma jamoalari o‘rtasida kechdi. Qattiq kurash va dramatik voqealarga boy bo‘lgan uchrashuv 1:1 hisobida durang bilan yakunlandi. Muxlislar va mutaxassislar bu to‘qnashuvni haqiqiy imtihon va xarakter sinovi sifatida baholamoqda.
Argentina terma jamoasi bosh murabbiyi Lionel Skaloni uchrashuvdan so‘ng o‘yin haqida to‘xtalib, jamoaning bir qator kuchli va zaif jihatlarini ochiq tan oldi.
— “Biz har doim uch yarim himoyachi bilan o‘ynaymiz, bu safar ham hech narsa o‘zgartirmadik. Lekin raqibning kuchli va harakatchan ekanini tan olish lozim. Kolumbiya terma jamoasi bu o‘yinga katta ahamiyat berdi va maydonda o‘z o‘yinini ko‘rsatishga urindi,” — dedi murabbiy.
Birinchi taymda Argentina o‘z o‘yinini topa olmadi, ritm sezilarli ravishda pasaydi. Ammo ikkinchi taymda jamoa o‘ziga xos impuls va xarakter ko‘rsatib, bir necha xavfli hujumlar uyushtirdi. Ayniqsa, Enso Fernandesning chetlatilishiga qaramay, argentinaliklar oxirigacha kurashni to‘xtatmadi. Skaloni bu holatni “jamoa kuchini tekshirish uchun ajoyib sinov” deb baholadi.
Messining 78-daqiqada almashtirilgani ham muxlislarda turli savollarni tug‘dirdi. Skaloni bu qarorni quyidagicha izohladi:
— “Boshida Leo maydonni tark etishni rejalashtirmagan edik. Biroq, ikkita almashtirishga tayyorgarlik ko‘rayotganimizda, Messi o‘zi maydonni tark etishini aytdi. Shu tariqa, u boshqalar o‘rniga almashtirildi.”
Bosh murabbiy raqib jamoa yulduzi Luis Dias haqida ham samimiy fikr bildirdi:
— “Men Luis Diasni futbolchi sifatida juda qadrlayman. Uni to‘g‘ridan to‘g‘ri maydonda tabrikladim. U haqiqiy yulduz va salohiyatli sportchi,” — dedi Skaloni.
Skalonining ta’kidlashicha, jamoa har bir o‘yindan saboq oladi va har qanday to‘siqlarni jiddiy sinov deb qabul qiladi. Argentina oldindagi saralash uchrashuvlariga jiddiy tayyorgarlik ko‘rishni va muxlislarni yangi g‘alabalar bilan xursand qilishni maqsad qilgan.
