Xabi Alonso “Real”da temir qoidalarni joriy etdi — maydonda ayanchsiz kurash kutilmoqda
“Real Madrid” tarixida yangi sahifa ochildi. Jahon futboli afsonalaridan biri, sobiq futbolchi va istiqbolli murabbiy Xabi Alonso endi “qaymoqranglilar”ni boshqaradi. Uning qo‘l ostidagi ilk rasmiy o‘yin 18 iyun kuni Klublar o‘rtasidagi Jahon chempionati doirasida bo‘lib o‘tadi. Raqib — Saudiya Arabistonining ambitsioz va katta sarmoyaga ega klubi “Al-Hilal”.
Biroq, o‘yindan avvalroq, Alonso jamoa ichida qat’iy va aniq tartib qoidalarni belgilab ulgurdi. Ispaniyaning “Cadena SER” radiosi orqali jurnalist Xaver Errayes tarqatgan ma’lumotga ko‘ra, Xabi Alonso futbolchilarga juda ochiq va qat’iy xabar yuborgan:
“Kim yugurmasa va bor kuchini maydonda qoldirmasa — o‘ynamaydi. Ismlar meni qiziqtirmaydi.”
Ya’ni, yangi murabbiy uchun kimning qanday yulduzlik darajasiga egaligi muhim emas. Faqat va faqat mehnat, intizom va maydondagi fidoyilik e’tiborda bo‘ladi. Bu so‘zlar orqali Alonso “Real”da “komfort zonasi”ga o‘rnashib olgan ayrim yulduzlarga dahlli signal yuborgan bo‘lishi mumkin.
Uning yana bir qat’iy ta’kidlashicha:
“Siz shunchaki to‘p kelishi va uni golga aylantirish uchun kutavermasligingiz kerak. Har bir vaziyat uchun kurashish, har bir to‘p uchun harakat qilish zarur.”
Bu yo‘l “Liverpul”, “Bavariya” va Ispaniya terma jamoasida chempionliklar ko‘rgan Alonso uslubiga xos. Uning uslubi — jamoaviy intizom, intellektual o‘yin va 90 daqiqa davomida tinimsiz harakat. Demak, “Real” futbolchilari endi maydonda “otdushina” izlash o‘rniga, har bir vaziyat uchun to‘liq fidoyi bo‘lishi talab etiladi.
Xabi Alonsoning ayrim futbolchilar bilan alohida muloqot o‘tkazgani va ularga kelgusi mavsumdagi o‘rni uchun kurash kerak bo‘lishini aytgani ham xabar qilindi. Shuningdek, u akademiyadan chiqqan yosh futbolchilarni asosiy tarkibga jalb qilish tarafdori ekanligini ham bildirgan.
Eslatib o‘tamiz, yangi mavsum boshlanishidan avval Karlo Anchelotti Braziliya terma jamoasiga rahbarlik qilish uchun Madridni tark etdi. Uning o‘rnini egallagan Xabi Alonso esa Germaniyada “Bayer” bilan ajoyib natijalarga erishgan, jumladan, Bundesliga chempioni bo‘lgan va Yevropa Ligasining finaligacha yetaklagan.
Endi esa uning oldida tarixiy vazifa — dunyodagi eng mashhur klublardan biri “Real Madrid”ni yangi davrga yetaklash turibdi.
Birinchidan, bu — jismoniy tayyorgarlik va intizom bo‘yicha yangi standartlar. Ikkinchidan, maydonda faqat ism bilan emas, ishtiyoq va harakat bilan o‘ynash kerak bo‘ladi. Futbolchilarga qo‘yilgan bu qat’iy talablar “Santyago Bernabeu”da yangi davr boshlanganidan darak beradi.
