Chelsi yana bir hujumchini sotib olishi mumkin

Londonning "Chelsi" jamoasi hujum chizig‘ini kuchaytirishga jiddiy kirishdi. Bu haqida Euro-football.ru xabar berdi.

Tez orada jamoaga Dortmundning "Borussiya" klubidan Jeymi Bayno-Gittens va "Brayton"dan Joao Pedro qo‘shilishi kutilmoqda. Ikkala transfer ham allaqachon tasdiqlangan.

Ushbu transferlarning umumiy qiymati 100 million yevrodan oshishi taxmin qilinmoqda. Shunga qaramay, "Chelsi" rahbariyati bu bilan to‘xtab qolmasligi mumkin.

Mashhur jurnalist Fabrizio Romano xabariga ko‘ra, Bayno-Gittens va Pedro kelgani bilan jamoa yana bir hujumchini sotib olish imkoniyatini ko‘rib chiqmoqda. Shu bilan birga, insayder Ben Jeykobss ham o‘xshash ma’lumotlarni taqdim etdi. Uning aytishicha, "Chelsi"ning keyingi maqsadi sifatida "Ayntraxht" klubi hujumchisi Ugo Ekitike ko‘rilmoqda.

Biroq bu transfer klubdagi vaziyatga, xususan, Nikolas Jeksonning jamoani tark etishiga bog‘liq bo‘ladi. Agar Jekson ketadigan bo‘lsa, "Chelsi" yangi hujumchini olish uchun imkoniyatga ega bo‘ladi.

Hozirgi vaqtda klub rahbariyati hujum liniyasini yanada mustahkamlash uchun faol ish olib bormoqda va bu borada qarorlar tez orada qabul qilinishi kutilmoqda.