Kristensen muddatidan oldin mashg‘ulotlarga qaytdi
“Barselona” jamoasining himoyachisi Andreas Kristensen ta’tilni muddatidan oldin yakunlab, ishga kirishdi. Bu haqida Euro-football.ru xabar berdi.
Chorshanba kuni futbolchi birinchi yakka mashg‘ulotini o‘tkazdi, deb xabar beradi jurnalist Mario Rios. Daniyalik futbolchining maqsadi iyul oyining 13-kuniga qadar eng yaxshi shaklga kirish va mavsumoldi tayyorgarlik boshlanganda asosiy tarkib uchun kurashishdir.
O‘tgan mavsum Andreas uchun murakkab o‘tgan, u doimiy jarohatlar tufayli maydonga faqat oltita o‘yinda chiqdi. 29 yoshli futbolchining “ko‘k-binafsha” jamoasi bilan shartnomasi yana bir yil davom etadi.
OAVda Kristensenga nisbatan “Barselona”dan tez orada ketishi haqida gaplar tarqaldi. Uning xizmatlariga “Yuventus” va Saudiya Arabistoni chempionati vakillari qiziqish bildirayotgani aytilmoqda.
Futbolchining kelajagi jamoada qolish yoki yangi jamoaga o‘tish atrofida kechayotgan muzokaralar orqali aniqlanadi. Shunga qaramay, Andreas mashg‘ulotlarga jiddiy yondashib, o‘z o‘rnini saqlab qolishga harakat qilmoqda.
