Qozog‘istonda har 10 yilda haydovchilik attestatsiyasi joriy etilishi mumkin
Qozog‘istonda 2024 yilda jarohatlanganlar ishtirokida 31 mingdan ortiq yo‘l-transport hodisasi qayd etildi, deb Finratings.kz xabar berdi. Senator Marat Kojaev bu ko‘rsatkichning yuqoriligini haydovchilarning tayyorgarligi yetarli darajada emasligi bilan bog‘liq deb hisoblaydi.
Senator Bosh vazir Oljas Bektenov nomiga yo‘llagan so‘rovda haydovchilarni o‘qitish va nazorat qilish tizimini qayta ko‘rib chiqishni taklif qildi. Unga ko‘ra, haydovchilar 10 yilda bir marta attestatsiyadan o‘tishlari shart bo‘ladi.
Kojaevning asosiy takliflari:
Avto maktablar ustidan davlat nazoratini kuchaytirish.
Yangi haydovchilar uchun sinov muddatini joriy qilish.
Haydovchilik guvohnomasi olinganidan 6 oy o‘tib malaka oshirish kurslarini o‘tish majburiyati.
Yo‘l harakati qoidalari va amaliy mashg‘ulotlarni har 10 yilda tekshirish.
Haydovchilik guvohnomalarini berish jarayonini IIV nazoratiga o‘tkazish.
Barcha yirik shahar va tuman markazlarida maxsus Yo‘l harakati markazlari va autodromlar tashkil etish.
Shuningdek, senator yo‘l infratuzilmasini yaxshilash bo‘yicha takliflar berdi. Ular qatorida ko‘p darajali piyodalar o‘tish joylarini qurish, yoritish tizimini yaxshilash, trotuarlar barpo etish va yirik shaharlarning chetlab o‘tuvchi yo‘llarini tezroq yaratish kabi chora-tadbirlar mavjud.
