AQSH prezidenti Donald Tramp va Rossiya prezidenti Vladimir Putin o‘rtasidagi telefon muloqoti yakunlandi. Muloqot ikki soatdan ortiq davom etdi. Bu haqda Oq uy vakiliga tayanib NBC News xabar berdi.
Tramp va Putin suhbati AQSHning Ukraina hududida 30 kunlik o‘t ochishni to‘xtatish bo‘yicha kelishuvga erishish harakatlari fonida bo‘lib o‘tdi. Ushbu suhbat davomida ikki davlat rahbarlari uzoq muddatli tinchlik kelishuvini muvofiqlashtirish masalasini muhokama qildilar. Kiyev tinchlik sulhi to‘g‘risidagi taklifni qabul qilgani ma’lum. Endi Vashington Moskvadan javobni kutmoqda.
Putinning matbuot kotibi Dmitriy Peskov ham TASS agentligiga telefon muloqoti yakunlanganini tasdiqladi.
Bu Donald Tramp Oq uyga qaytganidan beri ikki mamlakat yetakchilarining ikkinchi marta telefon orqali suhbatlashishi. Ularning birinchi suhbati 12 fevral kuni bo‘lib o‘tgan va o‘shanda suhbat bir yarim soat davom etgan. Mazkur muloqot natijasida prezidentlar Rossiya-Ukraina mojarosini hal qilish bo‘yicha muzokaralarni darhol boshlashga kelishib olgan.
AQSH yetakchisining maxsus vakili Stiven Uitkoff ham Tramp va Putin o‘rtasida telefon muloqoti bo‘lib o‘tishini xabar qilgan edi. «O‘ylaymanki, bu hafta ikki prezident o‘rtasida haqiqatan ham yaxshi va ijobiy muhokama bo‘ladi», — degan u.
Bu murakkab geosiyosiy vaziyatda ikki davlat rahbarlarining o‘zaro muloqotlari muhim ahamiyat kasb etishda davom etmoqda.
Tramp Putin bilan ikki soatdan ortiq telefon orqali muloqot qildi
👍 0❤️ 0😂 0😢 0😡 0
