Parij Pavel Durovni AQSHga chiqarishga ruxsat bermadi
Fransiya rasmiylari Telegram asoschisi Pavel Durovning AQSHga chiqishiga ruxsat bermadi. Bu haqda Politico nashri Parij prokuraturasi bayonotiga tayanib xabar berdi. Qayd etilishicha, qaror 12 may kuni qabul qilingan va unga asos sifatida “bunday safar uchun yetarli va zarur asos yo‘qligi” ko‘rsatilgan.
Durov ushbu safarni Amerikadagi investitsiya fondlari bilan muzokaralar o‘tkazish maqsadida rejalashtirganini ma’lum qilgandi. Ammo Fransiya hukumati uning chiqishiga rasman to‘sqinlik qildi.
Mazkur voqea ortidan yana bir jiddiy ayblov yuzaga chiqdi. 18 may kuni Pavel Durov Telegram'da qilgan bayonotida Fransiya tashqi razvedka xizmati — DGSE rahbari Nikolya Lerner Parijdagi Hotel de Crillon mehmonxonasida uni shaxsan uchrashuvga chaqirganini aytdi. Unga ko‘ra, Lerner Telegram orqali Ruminiya saylovlaridan oldin “konservativlar ovozini o‘chirishni” so‘ragan. Durov bu talabni rad etganini bildirdi.
Fransiya rasmiylari esa bu da’volarni keskin inkor etmoqda. DGSE vakillari rasmiy bayonotida ta’kidlashicha, ular Durov bilan faqat messenjer orqali tarqatilayotgan terrorchilik va bolalar pornografiyasiga oid kontentlar haqida suhbatlashishgan. Ularning aytishicha, uchrashuvlarda saylovlarga ta’sir o‘tkazish yoki senzura qilish haqida gap bo‘lmagan.
Ayni vaqtda Pavel Durov Fransiyada sud nazoratida qolmoqda. U hukumat ruxsatisiz mamlakatni tark etish huquqiga ega emas. Avvalroq, 2025 yil bahorida Fransiya hukumati unga vaqtincha Dubayga safar qilish uchun ruxsat bergandi.
Ma’lumot uchun, Pavel Durov 2024 yil avgust oyida Parijda ushlangan. Uga Telegram platformasida terrorchilik targ‘iboti va bolalarga nisbatan man etiladigan kontentni bloklamaslik ayblovlari qo‘yilgan. Huquqni muhofaza qiluvchi organlarning ta’kidlashicha, messenjer ma’muriyati tizimli ravishda davlat talablarini inkor qilib kelgan.
Zamin.uz tahririyati Telegram va Pavel Durov atrofidagi voqealar rivojini diqqat bilan kuzatishda davom etadi. Siz bu vaziyatda qaysi tarafning haqligini o‘ylaysiz? Bu voqealar messenjerlar erkinligiga tahdidmi yoki xavfsizlik ehtiyojimidan kelib chiqadimi?
