Reshford Barselonada tibbiy ko‘rikdan muvaffaqiyatli o‘tdi
Hujumchi Markus Reshford “Manchester Yunayted” klubidan “Barselona”ga o‘tishga yaqin turibdi. Bu haqida Euro-football.ru xabar berdi.
Sky Sports xabariga ko‘ra, 27 yoshli futbolchi dushanba kuni ertalab katalon klubi uchun tibbiy ko‘rikdan o‘tdi. Kutilishicha, Reshford chorshanba kuni “Barselona” futbolchisi sifatida rasmiy taqdimotdan o‘tadi.
U 1989 yildan beri “kataloniyaliklar” safida o‘ynagan birinchi ingliz futbolchisi bo‘ladi. O‘sha paytda jamoada Gari Lineker faoliyat yuritgan edi.
Avvalroq ma’lum qilinishicha, “Barselona” va “Manchester Yunayted” o‘rtasida Reshfordni ijaraga berish bo‘yicha kelishuvga erishilgan. Shartnomada 30 million yevro miqdorida sotib olish huquqi ham ko‘zda tutilgan bo‘lib, unga bonuslar ham qo‘shilgan.
Bu transfer jamoaning hujum chizig‘ini kuchaytirish maqsadida amalga oshirilmoqda.
