AQSH poytaxti Vashingtonda joylashgan Oq uyda joriy yil o‘tkaziladigan Klublar o‘rtasidagi Jahon chempionatiga bag‘ishlangan rasmiy tadbir bo‘lib o‘tdi. Tadbir davomida FIFA prezidenti Janni Infantino va AQSH prezidenti Donald Tramp musobaqaning yangi bosh sovrinini taqdim qilishdi.
Yangi shakldagi musobaqa 2025 yilda AQSH mezbonlik qiladigan ilk yirik klublar chempionati bo‘ladi. Turnir uchun tayyorlangan sovrin alohida e’tiborga sazovor. Bir qarashda lagan ko‘rinishida bo‘lgan kubok o‘ziga xos mexanizmga ega bo‘lib, maxsus kalit yordamida shaklini o‘zgartiradi.
Tramp va Infantino sovrinni Oval kabinetda namoyish qilar ekan, musobaqaning ahamiyati haqida fikr bildirishdi. Tramp AQSH futbol bo‘yicha yirik turnirlarni qabul qilishga tayyor ekanini ta’kidlagan bo‘lsa, Infantino yangi formatdagi musobaqa butun dunyo klublari uchun yangi imkoniyatlar eshigini ochishini ma’lum qildi.
Klublar o‘rtasidagi Jahon chempionati 2025 yilning 15 iyun – 13 iyul kunlari AQSHning bir nechta shaharlarida bo‘lib o‘tadi. Turnirda 32 ta klub ishtirok etadi va ular FIFA tomonidan joriy qilingan yangi formatda g‘oliblik uchun kurash olib boradi.
