Nemis hujumchisi Tomas Myuller o‘zining 25 yillik faoliyatini Myunxenning “Bavariya” klubida yakunlaganidan so‘ng, faoliyatini to‘xtatmasdan, boshqa qit’ada davom ettirishga qaror qildi. Bu haqida Euro-football.ru xabar berdi.
Sky Sport Germany xabariga ko‘ra, futbolchi Amerika MLS ligasidagi bir klub bilan shartnoma imzolash arafasida bo‘lib, kelasi haftada rasmiy bitim tuzilishi mumkin. Hali qaysi jamoa bilan shartnoma imzolanishi aniq emas, biroq asosiy nomzodlar qatorida “Los-Anjeles” klubi tilga olinmoqda.
Myuller 2025 yil yozida, klubaro jahon chempionati tugagach, “Bavariya”ni tark etgan. Myunxen klubida o‘tkazgan yillarida u 756 rasmiy o‘yinda maydonga tushib, 250 ta gol urdi va 276 assist muallifi bo‘ldi.
Uning hisobida “Bavariya” tarkibida 33 ta sovrin mavjud bo‘lib, ulardan ikki marta Chempionlar Ligasi g‘olibi bo‘lgan. Myuller o‘zining uzoq va muvaffaqiyatli faoliyati bilan klub tarixida muhim o‘rin egallaydi.
