Angliya Premer-ligasida o‘yinlardan oldin tizzani yerga qo‘yish an’anasi bekor qilinishi mumkin. Bu haqida Euro-football.ru xabar berdi.
The Guardian nashrining xabar berishicha, liga rahbariyati kelajakda irqchilikka qarshi bu harakat haqida barcha jamoa kapitanlari bilan maslahatlashishni rejalashtirmoqda. Bunday muhokama sababi sifatida ayollar terma jamoasi 2025 yilgi Yevropa chempionatining Italiya bilan o‘yini oldidan tizzasini yerga qo‘ymaslik qarori ko‘rsatilmoqda.
Ushbu qaror himoyachi Jess Karterga nisbatan keltirilgan irqchilik haqoratlariga javob sifatida qabul qilingan. Jamoa bosh murabbiyi Sarina Vigman bu harakatni yetarli darajada samarali deb hisoblamasligini ta’kidladi.
Professional futbol assotsiatsiyasi futbolchilarning qarorini qo‘llab-quvvatlab, irqchilikka qarshi kurashishda yangi usullarni izlash zarurligini bildirdi. 2024/2025 yilgi mavsumda Premer-liga jamoalari faqat boshlang‘ich va yakuniy turlarda hamda oktabr va aprel oylarida “Irqchilikka joy yo‘q” kampaniyasi doirasida tizzani yerga qo‘yishgan.
Bu an’ana keng tarqala boshlagani 2020 yildan hisoblanadi.
👍 0❤️ 0😂 0😢 0😡 0
