“Barselona” futbol klubi sobiq bosh murabbiyi Xavi Ernandes yaqin kelajakda o‘z mamlakatida ishlashni rejalashtirmayapti. Bu haqida Euro-football.ru xabar berdi.
Ispaniyaning bir necha klublari 45 yoshli mutaxassisga bosh murabbiylik lavozimini taklif qilishgan, biroq Xavi bu takliflarni rad etgan. “Marca” nashrining xabariga ko‘ra, Xavi o‘zining aniq pozitsiyasini bildirgan va hozircha “Barselona”dan boshqa birorta mahalliy jamoani boshqarish niyati yo‘qligini ta’kidlagan.
Ma’lumot uchun, Xavi 2023/24 yilgi mavsum yakunida “Barselona” klubidan iste’foga chiqarilgan edi. Uning o‘rnini esa Hans-Diter Flik egalladi.
Flik o‘tgan mavsumda “Barselona” bilan mamlakat chempionatida va boshqa ichki musobaqalarda yuqori natijalarga erishgan. Shuningdek, Xavi chet el chempionatida ham murabbiy sifatida faoliyat yuritgan.
U “Barselona”ga qaytishidan oldin Qatar davlatining “Al-Sadd” klubida bosh murabbiy bo‘lib ishlagan. Shu tariqa, tajribali mutaxassis hozircha Ispaniyadagi boshqa jamoalarda ishlash rejasini ko‘rib chiqmayapti.
