Manchester Yunayted Donnarumma uchun muzokaralarni boshladi
Manchester Yunayted jamoasi yozgi transfer mavsumida yangi darvozabon bilan shartnoma imzolashni o‘z oldiga maqsad qilib qo‘ygan. Bu haqida Euro-football.ru xabar berdi.
O‘tgan mavsumda jamoa darvozaboni Andre Onana bir necha bor xatolarga yo‘l qo‘ydi, shuningdek, u jarohat ham oldi. Shu sababli klub rahbariyati darvozabon pozitsiyasini mustahkamlash uchun yangi futbolchi izlamoqda.
The Telegraph nashrining yozishicha, Manchester Yunayted allaqachon Parij Sen-Jermen klubi darvozaboni Janluiji Donnarumma borasida so‘rov yuborgan. Frantsiyaning mashhur klubi yaqin kunlarda ingliz jamoasi bilan yana muzokaralar boshlanishini kutmoqda.
Parij Sen-Jermen jamoasi 26 yoshli Donnarummani aynan shu yozda sotishga majbur bo‘lishi mumkin. Sababi, agar futbolchi bilan yangi shartnoma bo‘yicha kelishuvga erishilmasa, kelasi yili u klubni erkin agent sifatida tark etishi ehtimoli bor.
Hozirda Donnarumma va klub o‘rtasida yangi shartnoma tuzish borasida muzokaralar qiyin kechmoqda. Shu sababli klub futbolchini sotishga qaror qilishi mumkin.
Manchester Yunayted esa darvozabon masalasida faol harakat qilmoqda.
