Lukas Tuta "Ayntraxt"dan "Al-Duhail"ga o‘tdi

Frankfurt shahri vakili bo‘lgan Germaniyaning "Ayntraxt" futbol klubi himoyachisi, braziliyalik Lukas Tuta jamoadan ketishi ma’lum qilindi. Bu haqida Euro-football.ru xabar berdi.

U o‘z faoliyatini Qatar davlatining "Al-Duhail" jamoasida davom ettiradi. "Lukas Tuta 2019 yildan beri "Ayntraxt" safida harakat qilib kelayotgan edi.

Klub ushbu 26 yoshli futbolchi uchun 15 million yevro miqdorida tovon puli oladi. Bu haqda Sky Sport axborot portali xabar berdi.

Ma’lumotlarga ko‘ra, Tuta yangi jamoasiga o‘tishdan oldin tibbiy ko‘rikdan muvaffaqiyatli o‘tgan. O‘tgan mavsumda Tuta klub safida 44 ta o‘yinda maydonga tushib, 8 marta ogohlantirish olgan va 2 ta gol urgan.

Ushbu transfer "Ayntraxt" sport direktori Markus Kreshe boshchiligida amalga oshirilgan navbatdagi yirik moliyaviy kelishuvlardan biri bo‘ldi. Bungacha klubni Ugo Ekitike ham tark etgan, u "Liverpul"ga 90 million yevro evaziga o‘tgan edi.

Shunday qilib, "Ayntraxt" o‘z futbolchilarini yuqori narxlarda sotish orqali klub byudjetini mustahkamlashda davom etmoqda.