Premer-liga antirekordchisi Richard Dann Husanovga qanday baho berdi?
O‘zbekiston milliy terma jamoasi markaziy himoyachisi Abduqodir Husanov "Lans"dan "Manchester Siti"ga o‘tish bilanoq jamoaning asosiy tarkibida o‘z o‘rnini topdi. Hozirda "shaharliklar" himoya chizig‘ini bir necha o‘yindan beri ushlab turgan va jamoa uchun muhim figuraga aylangan Husanov haqida Angliya futboli ekspertlari, ommaviy axborot vositalari va murabbiylar fikr bildirishda davom etmoqda.
Yaqinda Angliya Premer-ligasida uzoq yillar faoliyat yuritgan mashhur islandiyalik himoyachi Richard Dann “Manchester Siti”ning yanvar oyidagi transferlariga munosabat bildirar ekan, Abduqodir Husanovning imkoniyatlarini alohida ta’kidladi.
Dann: "Husanov jamoaga yorqin kirib keldi"
"Abduqodir Husanovning yaqinda "Manchester Siti"ga qo‘shilgani va jamoa o‘yiniga ta’sir o‘tkaza boshlaganini ijobiy baholayman. Odatda, "Siti" o‘z safiga yangi o‘yinchilarni jalb qilganda, ularning moslashuvi uchun muayyan vaqt talab etiladi. Ammo Husanov jamoaga yorqin tarzda kirishib ketdi. Albatta, uning "Chelsi"ga qarshi debyut uchrashuvining dastlabki daqiqalarida yo‘l qo‘ygan xatolari bor edi. Lekin bu holat futbolchining o‘zi uchun ham kutilmagan bo‘ldi. Shundan so‘ng u o‘zini yirik o‘yinchi sifatida namoyon etdi.
Abduqodir "Manchester Siti" uchun ajoyib transfer bo‘lib chiqdi. Xuddi shu fikrni Umar Marmushga nisbatan ham aytishim mumkin. Misrlik hujumchi himoyaga qaytishdan qochmaydi, sheriklariga qulay vaziyat yaratib berish uchun maydonda faol harakat qiladi va o‘zi ham gol urishga qodir. Ayni paytda Abduqodir Husanov ham, Umar Marmush ham juda yaxshi o‘ynayapti. Jamoada ularning darajasiga chiqa oladigan ko‘proq futbolchilar bo‘lishi maqsadga muvofiq.
Yanvarda jamoaga kelganlardan yana biri Niko Gonsales. Ammo men uni super iqtidor egasi emas, balki barqaror o‘yin ko‘rsatadigan yarim himoyachi sifatida baholayman. Jamoada hali ham kuchaytirish kerak bo‘lgan nuqtalar bor. Aslida bu ishlar yozda amalga oshirilishi rejalashtirilgan edi, ammo vaziyat tufayli klub yangi tarkibni shakllantirishni yanvardan boshladi. Kutilmoqdaki, "Manchester Siti" mavsum yakunlanganidan keyin ham o‘z safini kuchaytirishda davom etadi." – deydi Richard Dann.
Richard Dann – Premer-liganing antirekordchisi
Asli irlandiyalik bo‘lgan Richard Dann qariyb yigirma yillik professional faoliyatini Angliya Premer-ligasida o‘tkazgan. U dastlab "Everton" jamoasida to‘rt mavsum o‘ynagan, 2000 yili esa "Manchester Siti"ga ko‘chib o‘tib, jamoa safida to‘qqiz yil o‘ynagan va hatto sardorlik qilgan. Keyinchalik u "Aston Villa" va "Kuinz Park Reynjers" klublarida to‘p surib, 2015 yili butsalarini mixga ilishga qaror qildi.
Qizig‘i shundaki, Richard Dann Premer-liga tarixida ikki antirekord bilan mashhur:
2009 yili "Uigan Atletik"ga qarshi bahsda o‘z faoliyatidagi sakkizinchi qizil kartochkani olgan va Patrik Viyeyra hamda Dankan Fergyuson bilan birga bu ko‘rsatkich bo‘yicha rekordni takrorlagan.
U Premer-liga tarixida o‘z darvozasiga eng ko‘p – o‘nta avtogol urgan yagona futbolchi hisoblanadi.
Abduqodir Husanov "Manchester Siti" uchun juda muvaffaqiyatli transfer bo‘lib, jamoa himoyasida muhim o‘rin tutayotganini ko‘rsatmoqda. Angliya futbolida katta tajribaga ega bo‘lgan mutaxassislar, jumladan, Richard Dann ham uning yorqin kelajagi borligini ta’kidlamoqda. Yanvarda jamoaga qo‘shilgan futbolchilardan Husanov va Marmush o‘zlarini muvaffaqiyatli ko‘rsatayotgan bo‘lsa, klub yozgi transfer oynasida yanada kuchli tarkib yaratishni maqsad qilgan. Bu esa "Manchester Siti" muxlislari uchun qiziqarli davrlardan biri bo‘lishi mumkin.
