“Inter Mayami” futbol klubi Liga Kubogi doirasida “Nekaksa” jamoasiga qarshi o‘yinda Lionel Messidan ayrildi. Bu haqida Euro-football.ru xabar berdi.
Uchrashuv boshida argentinalik futbolchi maydonda yiqilib, og‘riqdan aziyat chekdi. Shifokorlar 38 yoshli futbolchiga birinchi yordam ko‘rsatishdi, biroq Messi o‘yinni davom ettira olmadi.
Natijada, murabbiy Xavyer Maskerano 11-daqiqada uni almashtirishga majbur bo‘ldi. Noqulay voqeadan so‘ng, “Inter Mayami” jamoasi tez orada Telasko Segoviya tomonidan urilgan gol evaziga hisobda oldinga chiqdi.
Biroq, bu ustunlik uzoqqa cho‘zilmadi. 18-daqiqada “Inter Mayami” bir futbolchisi kam bo‘lib qoldi va 33-daqiqada mehmonlar hisobni tenglashtirdi.
Uchrashuvda 1:1 hisobi qayd etildi. Avvalgi olti o‘yinda Lionel Messi “Inter Mayami” safida sakkizta gol va to‘rtta golli uzatmaga mualliflik qilgan.
Uning olgan jarohatining qanchalik jiddiy ekani haqida keyinroq ma’lumot beriladi. Hozircha Messi uchun ushbu uchrashuv erta yakunlandi.
