Cheryshev “Dinamo”ning sust startiga asosiy sabablarni aytdi

Sobiq futbolchi va murabbiy Dmitriy Cheryshev Moskvaning “Dinamo” jamoasi yangi mavsumning dastlabki o‘yinlarida kutilgan natijalarga erisha olmaganining sabablarini izohladi. Bu haqida Euro-football.ru xabar berdi.

Unga ko‘ra, jamoa hali to‘liq moslashib ulgurmagan va futbolchilar bir-birini yaxshi tushunishga harakat qilmoqda. Cheryshev ta’kidlashicha, bosh murabbiy Valeriy Karpin jamoada o‘z uslubini joriy qilmoqda va unga vaqt berish kerak.

Ma’lumot uchun, “Dinamo” yangi mavsumda dastlab Kaliningradning “Baltika” jamoasi bilan durang o‘ynadi, so‘ngra “Rostov” ustidan minimal hisobda g‘alaba qozondi va “Krasnodar”ga yutqazdi. Uch turdan so‘ng “Dinamo” to‘rt ochko jamg‘arib, Rossiya oliy ligasi turnir jadvalida o‘ninchi o‘rinda bormoqda.

Navbatdagi, to‘rtinchi turda “Dinamo” futbolchilari 10-avgust kuni safarda “Sochi” jamoasiga qarshi maydonga tushadi. Qayd etish joizki, “Sochi” jamoasi yangi mavsumda o‘tkazgan uchta uchrashuvning barchasida mag‘lub bo‘lgan.

Cheryshevning fikriga ko‘ra, “Dinamo” yaqin vaqt ichida o‘z o‘rnini topib, natijalarni yaxshilashi mumkin.