Roma Echeverri uchun taklifini 33 million yevroga oshirdi

Roma va Manchester Siti klublari hujumkor yarim himoyachi Klaudio Echeverri borasida muzokaralarni davom ettirmoqda. Bu haqida Euro-football.ru xabar berdi.

Rim klubi 19 yoshli futbolchini ijaraga olishni istamoqda. Avvalgi taklifda "bo‘rilar" futbolchini sotib olish huquqi uchun 25 million yevro taklif qilgan edi, biroq bu miqdor Manchester Siti uchun yetarli bo‘lmadi va taklif rad etildi.

Corriere dello Sport nashrining xabar berishicha, endi Roma taklifni yaxshilagan. Unga ko‘ra, futbolchini sotib olish varianti 33 million yevroga oshirilgan, shuningdek, Manchester Siti futbolchini qayta sotib olishda ustunlik huquqiga ega bo‘ladi.

Bu holatda ingliz klubi futbolchini 40 million yevro evaziga ortga qaytarib olishi mumkin. Klaudio Echeverri uchun ilgari Jirona ham da’vogarlik qilgan edi.

Biroq argentinalik futbolchi kataloniyaliklarning taklifini rad etdi va Romaga o‘tish istagini bildirdi. Eslatib o‘tamiz, 2024 yil boshida Manchester Siti Echeverrini River Pleytdan 18,5 million yevro evaziga xarid qilgan edi.

Hozirda futbolchining kelajagi Romaga o‘tishi mumkinligi bilan bog‘liq muzokaralar davom etmoqda.