«Napoli» futbol klubi yarim himoyachisi Skott Maktominay «Oltin to‘p» mukofoti uchun nomzodlar ro‘yxatiga kiritilishi kutilmoqda. Bu haqida Euro-football.ru xabar berdi.
Barcha nomzodlarning ismlari bugun, 7-avgust kuni e’lon qilinadi. Insider ma’lumotiga ko‘ra, Skott Maktominay ham ushbu nomzodlar safidan o‘rin oladi.
28 yoshli shotlandiyalik futbolchi Italiyada o‘zining ilk mavsumini yuqori saviyada o‘tkazdi. U “Napoli” jamoasiga Antonio Konte boshchiligida Italiya chempionligini qo‘lga kiritishda yordam berdi va mavsumning eng yaxshi futbolchisi deb topildi.
Skott Maktominay joriy mavsumda barcha musobaqalarda “Napoli” tarkibida 36 ta o‘yinda maydonga tushib, 13 ta gol urdi va 6 ta golli uzatmani amalga oshirdi. O‘tgan yilning avgust oyida Italiya klubi Maktominayni “Manchester Yunayted”dan 30,5 million yevro evaziga sotib olgan edi.
«Oltin to‘p» mukofotini topshirish marosimi 22-sentabrga belgilangan. Hozirgi mukofot sohibi — “Manchester Siti” futbolchisi Rodri hisoblanadi.
Bu yilgi tanlovda ham bir qator mashhur futbolchilar ishtirok etadi. Maktominayning nomzodlar safidan joy olishi uning faoliyatidagi muhim voqea bo‘lishi mumkin.
