Al-Nasr Komanni sotib olish uchun taklifni oshirdi
Al-Nasr futbol klubi Germaniyaning mashhur Bavariya jamoasida to‘p surayotgan vinger Kingsli Komanni o‘z tarkibiga qo‘shib olish uchun harakatlarni davom ettirmoqda. Bu haqida Euro-football.ru xabar berdi.
Ma’lumotlarga ko‘ra, Myunxen klubi Saudiya Arabistonining Al-Nasr jamoasidan 22 million yevro miqdoridagi dastlabki taklifni rad etgan. Shunga qaramay, muzokaralar to‘xtamagan va Al-Nasr klubi taklifni 25 million yevrogacha oshirgan.
Bu miqdorga hali bonuslar kiritilmagan. Bavariya ushbu taklifga hozircha javob bermagan.
Ayni paytda, ayrim manbalarga ko‘ra, Kingsli Koman Al-Nasr klubi bilan shaxsiy shartnoma shartlarini kelishib olgan. 29 yoshli fransiyalik futbolchi o‘tgan mavsumda Bavariya safida jami 45 uchrashuvda maydonga tushib, 9 ta gol urgan va 6 ta golli uzatmani amalga oshirgan.
Kingsli Koman o‘tgan mavsumda jamoaning muhim o‘yinchilaridan biri bo‘lgan. Muzokaralar natijasida futbolchining kelajagi yaqin kunlarda aniqlik kasb etishi kutilmoqda.
