Madridning Real klubi 18 yoshli Tiago Pitarcha o‘yinidan hayratda qolmoqda. Bu haqida Euro-football.ru xabar berdi.
U hozircha asosiy jamoada debyut qilmagan bo‘lsa-da, yosh yarim himoyachi katta umid uyg‘otmoqda. ESPN manbalariga ko‘ra, ispan va marokash ildizlariga ega bo‘lgan bu futbolchi o‘zining harakatlari, maydondagi faolligi va mahorati bilan mashhur bo‘lgan PSJ klubi futbolchisi Vitinya kabi o‘yin uslubiga ega deb ta’riflanmoqda.
Mutaxassislarning fikriga ko‘ra, Tiago Pitarcha juda kuchli, energiyaga boy va raqib himoya chiziqlarini yorib o‘tishda, aniq uzatmalar hamda dribling orqali o‘zini ko‘rsatmoqda. Shu bois, Real klubi tarkibida istiqbolli futbolchi sifatida unga katta e’tibor qaratilmoqda.
Shuningdek, ayrim manbalarga ko‘ra, klub bosh murabbiyi Xabi Alonso yangi yarim himoyachini jamoaga olib kelishni istagan, biroq transfer bozori talablariga mos nomzod topilmagan. Shu sabab, murabbiy mavjud imkoniyatlardan foydalanishga qaror qilgan.
Klub ichki zaxiralardan foydalanib, yosh futbolchilarga imkon berishni rejalashtirmoqda. Mazkur qaror Real jamoasining o‘z tarbiyalanuvchilariga ishonch bildirayotganini ko‘rsatadi.
