Moskvaning “Torpedo” klubi sobiq prezidenti, shuningdek, Rossiya futbol ittifoqida ishlagan Aleksandr Tukmanov noyabr oyida o‘tkaziladigan o‘rtoqlik uchrashuvlari yuzasidan o‘z fikrini bildirdi. Bu haqida Euro-football.ru xabar berdi.
12 noyabr kuni Valeriy Karpin boshchiligidagi Rossiya terma jamoasi dunyo reytingida 42-o‘rinda turgan Peru terma jamoasi bilan bahs olib boradi. Uch kundan so‘ng esa, ularga 57-o‘rinda qayd etilgan Chili terma jamoasi raqiblik qiladi.
Aleksandr Tukmanovning so‘zlariga ko‘ra, bu safargi raqiblar kuchli va jiddiy hisoblanadi. U o‘rtoqlik uchrashuvlari avvalgidek oson kechmasligini ta’kidladi.
Chunki Peru va Chili terma jamoalarida ko‘plab futbolchilar Yevropa klublarida to‘p surishadi. Bu esa, o‘yinlarning yuqori saviyada o‘tishini anglatadi.
Ma’lumot uchun, Rossiya terma jamoasi Peru bilan bungacha hech qachon maydonda to‘qnash kelmagan. Chili terma jamoasi bilan esa, faqat bir marta – 2017 yilda o‘rtoqlik uchrashuvi o‘tkazilgan.
O‘sha bahs 1:1 hisobida yakunlangan. Ushbu o‘yinlar Rossiya terma jamoasi uchun muhim sinov bo‘lishi kutilmoqda.
