Rossiya klublari uchun legionerlar limiti yana qisqarishi mumkin

Mashhur sharhlovchi Gennadiy Orlov Rossiya Premyer-ligasida legionerlarga qo‘yiladigan cheklovlarni kuchaytirish ehtimoli haqida fikr bildirdi. Bu haqida Euro-football.ru xabar berdi.

Hozirgi vaqtda “13+8” tizimi amal qilmoqda, ya’ni klub ro‘yxatida 13 nafar mahalliy va 8 nafar legioner bo‘lishi mumkin. Yangi taklifga ko‘ra, bu format o‘rniga “10+5” tizimi joriy qilinishi mumkin.

Bu tizimga ko‘ra, har bir jamoa mavsum uchun 10 nafar legionerni ro‘yxatdan o‘tkazishi va bir vaqtning o‘zida maydonda 5 nafar legioner o‘ynashi mumkin bo‘ladi. Orlovning fikricha, legionerlar soniga cheklovlarni kuchaytirish Rossiya klublari uchun Yevropa musobaqalariga qaytishda qo‘shimcha qiyinchiliklar tug‘diradi.

U shunday deydi: “Bizning jamoalarimiz uzoq tanaffusdan so‘ng Yevropa musobaqalarida qatnashishda qiynaladi. Agar yana legionerlar sonini kamaytirsak, natija qanday bo‘ladi?

Hozir ham milliy terma jamoadan markaziy himoyachi topa olmayapmiz. Rossiyalik markaziy himoyachilar yo‘q”, – deya ta’kidlaydi Orlov.

Ma’lumki, UEFA tomonidan Rossiya futbol ittifoqiga nisbatan sanksiyalar joriy etilganiga uch yarim yildan oshdi. Avvalroq Rossiya futbol ittifoqi rahbari Aleksandr Dyukov ushbu sanksiyalar 2025 yil oxirigacha bekor qilinishi mumkinligini bildirgan edi.

Shu sababli, legionerlar limiti masalasi Rossiya futboli uchun dolzarb mavzu bo‘lib qolmoqda.