Karlo Anchelotti “Real”ni tark etishga qaror qildi. Uning yangi ish joyi ham ma’lum!
“Real Madrid” klubi bosh murabbiyi Karlo Anchelotti bugungi kunda katta o‘zgarishlar arafasida turibdi. Ispaniya Kubogi finalida «Barselona»ga qarshi o‘yindagi alamli mag‘lubiyatdan keyin, italiyalik taniqli mutaxassis o‘z kelajagi borasida muhim bir qaror qabul qildi.
The Athletic nashri tarqatgan ma’lumotga ko‘ra, 65 yoshli murabbiy «Qirollik klubi»dan ketishga va o‘z faoliyatini boshqa joyda davom ettirishga qaror qilgan. Anchelotti Madrid klubi rahbariyatiga o‘zining aniq rejasini ma’lum qilgan. Unga ko‘ra, tajribali mutaxassis joriy mavsum yakunlangach, «Real»ni tark etib, Braziliya milliy terma jamoasini boshqarishni boshlamoqchi.
Ma’lum qilinishicha, Anchelotti va madridliklar o‘rtasidagi amaldagi shartnoma muddati 2026 yilning yoziga qadar belgilangan bo‘lsa-da, tomonlar hozirdanoq hamkorlikni to‘xtatish bo‘yicha muzokaralarga kirishgan. Ushbu jarayon yaqin kunlarda rasman yakunlanishi mumkin.
Yana bir muhim jihati shuki, Anchelotti 15 iyundan start oladigan klublar o‘rtasidagi jahon chempionatida ham «Real»ni boshqarmasligi deyarli aniq bo‘lib ulgurdi. Tajribali murabbiy bu musobaqagacha Madrid bilan xayrlashadi va o‘z e’tiborini to‘liq ravishda Braziliya termasiga qaratadi.
Eslatib o‘tamiz, Anchelotti «Real» safida katta yutuqlarga erishgan va muxlislar orasida katta hurmat qozongan edi. Endilikda Braziliya milliy jamoasi uning boshchiligida 2030 yilgi Jahon chempionatiga tayyorgarlik ko‘radi. Anchelotti terma jamoa bilan katta g‘alabalarni nishonlashni rejalashtirmoqda.
