«Manchester Siti» bosh murabbiyi Pep Gvardiola Angliya Kubogida ishlatiladigan to‘p haqida yana bir bor tanqidiy fikr bildirdi. Uning fikricha, Mitre Sports kompaniyasi tomonidan ishlab chiqarilgan bu to‘p bilan o‘ynash juda qiyin va futbolchilarga jiddiy noqulaylik tug‘diradi.
Eslatib o‘tamiz, «Manchester Siti» Angliya Kubogi yarim finalida «Nottingem Forest» ustidan 2:0 hisobida g‘alaba qozonib, turnirning hal qiluvchi bosqichiga yo‘l oldi.
O‘yindan so‘ng jurnalistlar bilan suhbatda Gvardiola futbolchilarda charchoq belgilari sezilgani va bu vaziyatda to‘pni nazorat qilish qiyinlashganini ta’kidladi:
«Ikkinchi bo‘limda "Nottingem Forest" yanada kuchliroq pressing qila boshlashini oldindan bilardik. Bir necha marta to‘pni yo‘qotdik, chunki futbolchilarimizda charchoq aniq sezildi. To‘p juda tez edi, u yerda sakrab ketishi ham har ikki jamoa uchun muammo bo‘ldi. Bunday to‘p bilan o‘ynash, uning trayektoriyasini oldindan bilish juda murakkab ekan».
Shu bilan birga, ispaniyalik mutaxassis jamoasining finalga yo‘l olganidan mamnunligini yashirmadi va «shaharliklar» yana bir bor sovrin uchun kurashish imkoniga ega bo‘lganidan xursand ekanini ta’kidladi:
«Hamma qiyinchiliklarga qaramay, biz buni uddaladik va finalga chiqdik. Men yana Angliya Kubogi finalida qatnashish imkoniyatiga ega bo‘lganimdan xursandman», — deya qo‘shimcha qildi Gvardiola.
Ma’lumot uchun, Angliya Kubogi finalida «Manchester Siti» raqibi kim bo‘lishi tez orada ma’lum bo‘ladi. Gvardiola shogirdlari esa bu mavsumni yana bir sovrin bilan boyitishga harakat qiladi.
