UYEFA Chempionlar ligasi yarim finalining «Inter» va «Barselona» o‘rtasidagi keskin kechgan ikkinchi uchrashuvida (4:3, birinchi o‘yin – 3:3) ko‘ngilsiz holat sodir bo‘ldi. Birinchi bo‘limning qizg‘in pallasida ikki jamoa futbolchilari o‘rtasida ziddiyatli vaziyat yuz berdi. Jumladan, kataloniyaliklarning himoyachisi Inigo Martines raqib jamoa himoyachisi Franchesko Acherbi tomoniga tuflagani bahslarga sabab bo‘ldi.
Bu epizod 24-daqiqada Hoqon Chalxanog‘lu tomonidan kiritilgan penaltidan so‘ng sodir bo‘lgan. Golni nishonlash vaqtida Acherbi raqib jamoa futbolchilari tomonga qarab qichqirgan, shu paytda Martines unga nisbatan noo‘rin harakat qilib, raqib tomonga tuflagan. Ammo uchrashuvning bosh hakami, Shimon Marchinyak bu vaziyatni e’tiborsiz qoldirib, futbolchiga na ogohlantirish, na qizil kartochka ko‘rsatgan.
O‘yindan so‘ng matbuot bilan bo‘lgan muloqotda ispaniyalik himoyachi o‘z harakatiga izoh berib o‘tdi va o‘ziga qaratilgan tanqidlarga javob qaytardi.
– «Ha, men qilgan ishim to‘g‘ri emas edi. Buni yaxshi tushunib turibman va shu harakatim uchun afsusdaman. Ammo vaziyatni to‘g‘ri tushunish lozim – Acherbi 2:0 hisobini nishonlab, menga yaqin kelib baqirdi. Bu esa juda provokatsion harakat edi. O‘sha paytda hissiyotlarimni jilovlay olmadim va uning tomoniga tufladim, biroq unga tegmagan. Agar tuflaganim unga tekkan bo‘lsa, hakam menga darhol qizil kartochka ko‘rsatgan bo‘lardi, buni yaxshi bilaman va shubha qilmayman», – deb tushuntirdi Martines.
Futbolchining bu harakati ijtimoiy tarmoqlarda va sport nashrlarida jiddiy bahslarni keltirib chiqardi. Ayrim futbol ekspertlari va muxlislar Martinesning harakatini keskin tanqid qilsa, boshqa bir guruh uning hissiyotlarga berilganini va bunday holatlar muhim uchrashuvlarda yuz berib turishini ta’kidladi.
O‘yindan keyingi tahlillarda hakamning mazkur epizodga e’tibor qaratmagani ham keng muhokamalarga sabab bo‘lmoqda. Xususan, VAR tizimining bu vaziyatga qanday baho bergani va hakamlar nima uchun chora ko‘rmagani borasida savollar paydo bo‘lmoqda.
Inigo Martinesning o‘zi ushbu epizoddan keyin jamoasidan va muxlislardan uzr so‘rab, kelgusida bunday holatlarga yo‘l qo‘ymaslikka harakat qilishini bildirdi. Bundan tashqari, UYEFAning ham mazkur holat bo‘yicha alohida bayonot berishi kutilmoqda.
Qanday bo‘lmasin, bu kabi vaziyatlar futbol maydonida yuz berib turishiga qaramay, sportdagi odob-axloq qoidalari va o‘zaro hurmatni saqlash muhimligi yana bir bor eslatib o‘tildi.
«Barselona» va «Inter» o‘rtasidagi keskin bahslar va tortishuvlar hali ko‘p vaqt davomida muhokama qilinadigan ko‘rinadi. Inigo Martines esa o‘zini o‘zi oqlashga harakat qilib, bu bahslarga nuqta qo‘ymoqchi.
