Ispaniya La Ligasida chempionlik uchun kurash qizg‘in pallaga kirgan bir paytda, «Barselona» jamoasi bosh murabbiyi Xans-Diter Flik jiddiy yondashuvni tanlamoqda. Uning ta’kidlashicha, chempionlik haqida oldindan o‘ylab, bayram qilish haqida gapirish hali hech kimga foyda bermaydi.
Kataloniya jamoasi 36-tur doirasida «Espanol»ni mag‘lub etsa, Ispaniya chempioni sifatida rasman e’lon qilinadi. Ammo Flik va uning shogirdlari uchun bu — faqatgina imkoniyat, kafolat emas.
«O‘yin oldidan bayram haqida o‘ylash yoki gapirish menimcha mutlaqo noto‘g‘ri. Hozirgi eng muhim narsa — bu uch ochkoni qo‘lga kiritish. Hamma narsada hurmat va professional yondashuv bo‘lishi kerak. Biz faqat o‘yinga diqqat qaratishga majburmiz», — dedi «Barselona» ustozi jurnalistlar savoliga javoban.
«Real»ning o‘yini Flikni qiziqtiryaptimi?
Jurnalistlar tomonidan berilgan yana bir savol — «Real Madrid» va «Malorka» o‘rtasidagi bahsni kuzatasizmi?» — degan savolga Flik shunday javob berdi:
«Hozircha qaror qilganim yo‘q. Ammo albatta natijadan xabardor bo‘laman. Biz esa o‘z frontimizda ishni a’lo darajada bajarishimiz kerak», — deya javob qaytardi nemis mutaxassisi.
Kataloniyaliklar chempionlik ostonasida
Ayni vaqtda «Barselona» 82 ochko bilan La Liganing peshqadami bo‘lib turibdi. «Real Madrid» esa 75 ochko bilan ikkinchi o‘rinda. Agar «Real» bugungi «Malorka»ga qarshi o‘yinda ochko yo‘qotsa, «Barselona» ertaga «Espanol» ustidan qozoniladigan g‘alaba bilan chempionlikni rasman qo‘lga kiritadi.
Sabr va ehtiyot — Flik uslubi
Xans-Diter Flikning yondashuvi — hech qanday shoshma-shosharliksiz, ehtiyotkorlik va professionallik asosida ish olib borish. Uning bu pozitsiyasi jamoa ichidagi intizomni saqlab, futbolchilarni ortiqcha bosimdan himoya qilmoqda.
Zamin.uz tahririyati «Barselona» jamoasiga yaqindagi hal qiluvchi bellashuvda omad tilaydi. Chempionlikkacha bor-yo‘g‘i bir qadam qolgan, ammo futbol — bu kutilmagan burilishlar o‘yini ekani ham yoddan chiqmasligi lozim.
