"Manchester Siti"ning asosiy to‘purari va Norvegiya terma jamoasi hujumchisi Erling Xoland joriy mavsumda jamoaning APLdagi natijalari haqida shaxsiy fikrlari bilan o‘rtoqlashdi.
Xozirgi vaqtda Xosep Gvardiola boshqaruvidagi "Siti" Angliya Premer-ligasida 65 ochko bilan turnir jadvalining to‘rtinchi pog‘onasida joylashgan. Ushbu holat klubning so‘nggi yillardagi yuqori standartlari bilan solishtirilganda, muxlislar va futbolchilar uchun qoniqarli emas.
Xoland: “Bunday natijalar bilan qoniqish mumkin emas”
— Agar siz Premer-ligada ketma-ket to‘rt marta chempionlikni qo‘lga kiritgan bo‘lsangiz, beshinchisini yutmaslik – bu albatta orqaga chekinishdek tuyuladi. Biz shu darajadagi talab va standartlarni o‘rnatib bo‘lganmiz. Shu bois, mavsumni muvaffaqiyatli deb baholash qiyin, — dedi Xoland.
Uning ta’kidlashicha, jamoa bu mavsumda barqaror o‘yin ko‘rsata olmadi va ko‘plab muhim ochkolarni yo‘qotdi. G‘alabali seriyalarning yetishmasligi ham jamoaning chempionlik uchun kurashishda ortda qolishiga sabab bo‘lgan.
— Biz yetarlicha g‘alabali seriyaga ega bo‘lolmadik. Axamiyatli o‘yinlarda ko‘proq ruhiy barqarorlik va jiddiy tayyorgarlik kerak edi, — deya qo‘shimcha qildi u.
Jarohatlar va formadan chetlashish — lekin bahona yo‘q
Xoland, shuningdek, jamoadagi jarohatlar haqida ham to‘xtalib o‘tdi, biroq buni asosiy bahona sifatida ko‘rmadi:
— Ha, mavsum davomida bir nechta muhim futbolchilar jarohat oldi. Ammo bunday darajadagi klub uchun bu oddiy bahona bo‘lolmaydi. Har bir futbolchi o‘zining eng yaxshi formasida bo‘lishi kerak. Agar shunday bo‘lmasa, bu mamlakatda g‘alaba qozonish juda murakkab, — dedi u.
Maqsad – hali ham oldinda
Shu bilan birga, Xoland hozirdagi holatda ham "Siti"da Chempionlar ligasi uchun imkoniyat saqlanib qolganini ta’kidlab o‘tdi. Unga ko‘ra, mavsumni yuqori notada yakunlash uchun barcha futbolchilar so‘nggi bahslarda jonbozlik bilan harakat qilishi lozim.
Zamin.uz tahririyati “Manchester Siti”ning so‘nggi haftalardagi natijalarini kuzatib, Yevropa yo‘llanmasi uchun kurashdagi vaziyatni yoritishda davom etadi. Xolandning tanqidiy bahosi ortidan jamoa yana qanday yo‘l tutadi?
