Superliganing 10-turidan o‘rin olgan “Sho‘rtan” – “Andijon” (1:0) uchrashuvidan so‘ng, mehmonlar bosh murabbiyi Maksim Shatskix matbuot anjumanida jamoasining o‘yini, hakamlar qarori va kelgusi rejalar haqida fikr bildirdi.
“Bir futbolchi kam bo‘lsak ham yaxshi o‘ynadik”
— Ikkinchi taymda jamoam yomon o‘ynamadi. To‘g‘risi, hakamlar tomonidan ko‘rsatilgan qizil kartochka men uchun tushunarsiz bo‘ldi. Qizig‘i, raqibga ko‘rsatilgan kartochkaning bekor qilinishi VAR orqali qayta ko‘rib chiqilgandan so‘ng amalga oshdi. Shunday bo‘lsa-da, 10 kishi bo‘lib qolganimizga qaramay, ikkinchi bo‘limda o‘yinni yaxshi tashkil qildik. Imkoniyatlar ham bo‘ldi. Futbolchilar ko‘rsatmalarimizni to‘liq bajarishga harakat qilishdi. Ammo birinchi daqiqalarda ko‘proq e’tiborli bo‘lish kerak edi. Shu bois, natija bizni qanoatlantirmadi. Do‘stona durang adolatliroq bo‘lar edi.
“Ba’zi futbolchilar pozitsiyasiga mos emas edi”
— Jamoamizda ayrim asosiy futbolchilar – Farhod Sohibjonov, Mirzad Mexanovich va Luka Uskokovich jarohat sabab qaydnomaga kiritilmadi. Umuman olganda, ba’zi o‘yinchilar o‘z pozitsiyalarida emas, zarurat tufayli boshqa chiziqlarda harakat qilishdi. Bu esa natijaga ta’sir qilmasdan qolmadi. Musobaqa avvalidagi seleksiyaga men javobgar emasman, hozirgi sharoitda bor futbolchilardan foydalanmoqdamiz.
“Qizil kartochka qarorini qayta ko‘rish kerak”
— Birinchi bo‘limdagi qizil kartochka haqida gapiradigan bo‘lsam, bu to‘g‘ri qaror bo‘lmadi, deb o‘ylayman. Fol bo‘lgan, lekin chetlatish darajasida emas edi. Hakamlar nega shunday qaror qabul qildi — tushunish qiyin. Bunday vaziyatni hakamlar qo‘mitasi qayta ko‘rib chiqishi kerak. Bu chiqarilgan qaror o‘yinga va rejalarimizga jiddiy ta’sir qildi.
“Maqsadimiz — yuqori pog‘onalar uchun kurashish”
— Biz har bir o‘yinda g‘alaba uchun kurashamiz. Bu mag‘lubiyat biz uchun sinov bo‘ldi. Chempionatdagi tanaffus davomida yetarli tayyorgarlik ko‘rib, yangi ruhda qaytishni niyat qilganmiz. Jamoaning qaysi chiziqlarini kuchaytirish kerakligini aniq bilamiz va bu borada ish olib boramiz.
Zamin.uz tahririyatidan:
“Andijon” murabbiyining tanqidiy yondashuvi jamoa oldida aniq rejalar borligini ko‘rsatmoqda. Tayyorgarlik davomida qilingan ishlar, jarohatlardan qaytgan futbolchilar va taktik yechimlar jamoaning keyingi taqdiriga jiddiy ta’sir ko‘rsatadi. Siz Shatskix boshchiligidagi “Andijon”dan nimalar kutyapsiz?
