Futbol muxlislari uchun yana bir ajoyib bayram yaqinlashmoqda. Bu yil ilk marta yangi formatda tashkil qilinayotgan FIFA klublar o‘rtasidagi jahon chempionatida qatnashadigan barcha jamoalarning nomi ma’lum bo‘ldi. Bugunga qadar oxirgi yo‘llanma uchun keskin kurashlar ketgan edi va bu yo‘llanma AQSHning “Los-Anjeles” jamoasiga nasib etdi. “Los-Anjeles” Meksikaning kuchli klublaridan biri hisoblangan “Amerika”ni 2:1 hisobida mag‘lub etib, muhim musobaqaga chiptani qo‘lga kiritdi.
Ushbu nufuzli turnir 15 iyun kuni AQSHda start oladi va butun dunyodan yig‘ilgan eng kuchli 32 klub jamoalari o‘rtasida bo‘lib o‘tadi. Yangi formatga ko‘ra, jamoalar 8 ta guruhga bo‘linib, har bir guruhdan ikkita eng yaxshi jamoa pley-off bosqichiga yo‘l oladi.
Avvalgi formatga nisbatan bu yil ishtirokchilar soni keskin oshirilgan. Ushbu yangilik muxlislarga yanada qiziqarli va keskin o‘yinlarni taqdim etishni maqsad qilgan. Endi esa chempionatning barcha ishtirokchilari bilan yaqindan tanishamiz.
UYEFA vakili sifatida Yevropaning eng kuchli klublari bu turnirda qatnashadi. Ular orasida Angliya grandlari “Chelsi” va “Manchester Siti”, Ispaniyaning kuchli uchligi – “Real Madrid”, “Atletiko Madrid”, “Barselona”, shuningdek, Germaniyaning “Bavariya”si va Fransiyaning Chempionlar ligasi g‘olibi “Pari Sen-Jermen” bor. Italiya sharafini esa “Inter” va “Yuventus”, Portugaliya sharafini “Portu” va “Benfika”, Avstriyani
esa “Red Bull Zalsburg” himoya qiladi.
Janubiy Amerika futbol konfederatsiyasi (KONMЕBOL) jamoalari orasida Braziliya klublari alohida ajralib turadi. Bu mamlakatdan “Palmeyras”, “Flamengo”, “Fluminense” va “Botafogo” chempionatda ishtirok etadi. Argentinadan esa ikki buyuk raqib – “River Pleyt” va “Boka Xuniors” ishtirok etadi.
Shimoliy Amerika, Markaziy Amerika va Karib dengizi mintaqasi (KONKAKAF) ham o‘zining eng yaxshi klublarini yubormoqda. Ular orasida Meksikaning “Monterrey” va “Pachuka” klublari, AQSHning “Sietl Saunders”, “Inter Mayami” hamda yaqindagina turnirga yo‘llanma olgan “Los-Anjeles” bor.
Osiyo qit’asidan esa (OFK) klublari ichida Saudiya Arabistonining kuchli “Al-Hilol” jamoasi, Yaponiyaning “Urava Red Daymonds”, BAAning “Al-Ayn” va Janubiy Koreyaning “Ulsan Xyonde” klublari kurash olib boradi.
Okeaniya futbol konfederatsiyasidan esa doimgidek yangi zelandiyalik kuchli jamoa “Oklend Siti” ishtirok etadi. Afrika qit’asi (KAF) sharafini esa Misrning “Al-Ahli”, Marokashning “Vidad”, Tunisning “Esperans” va Janubiy Afrikaning “Mamelodi Sandaunz” klublari himoya qiladi.
Bu musobaqa uchun FIFA klublarga alohida imtiyoz ham taqdim etmoqda. Jahon chempionati oldidan 1 iyundan 10 iyungacha maxsus transfer oynasi ochiladi va unda ishtirok etuvchi jamoalar o‘z tarkiblarini kuchaytirish imkoniyatiga ega bo‘ladilar. Bu esa turnirning qizg‘inligini yanada oshiradi.
Yangi formatdagi klublar mundiali nafaqat futbol ixlosmandlari uchun, balki futbolchilarning o‘zi uchun ham juda muhim imkoniyatdir. Bu yirik musobaqa orqali futbol klublari o‘z nufuzlarini yanada oshirish, shuningdek, muxlislarga unutilmas lahzalar taqdim etish imkoniga ega bo‘ladilar.
Shunday qilib, butun dunyo muxlislari katta qiziqish bilan kutayotgan bu turnir har jihatdan qiziqarli o‘tishini ta’minlash uchun tashkilotchilar tomonidan barcha choralar ko‘rilmoqda. Bu yilgi klublar o‘rtasidagi jahon chempionati barchamiz uchun yorqin futbol bayrami bo‘lib qolishi kutilmoqda.
