Fayzullayev ishtirok etgan finalda SSKA Rossiya kubogini yutib oldi! (video)

Moskvadagi “Lujniki” stadionida futbol muhlislari uzoq kutgan o‘yin — Rossiya kubogi superfinali bo‘lib o‘tdi. Unda “SSKA” va “Rostov” jamoalari bosh sovrin uchun bahslashdi. Bellashuv katta qiziqish bilan kuzatildi va muxlislar so‘nggi daqiqalargacha qanday natija chiqishini bilmas edilar.

Uchrashuvda jamoalar ehtiyotkorlik bilan harakat qilib, asosiy vaqtni 0:0 hisobida yakunlashdi. Qarshi hujumlar va yakkalikdagi to‘qnashuvlar juda shiddatli kechdi. Har ikki darvozabon o‘z mahoratlarini namoyon qilishdi.

O‘yinning 73-daqiqasida esa yurtimiz vakili Abbosbek Fayzullayev maydonga tushirildi. O‘zbekiston terma jamoasi yarim himoyachisi finalning eng muhim pallasida jamoasiga yordam berish imkoniyatiga ega bo‘ldi. Uning faol harakatlari muxlislar tomonidan ijobiy baholandi.

Bellashuvning taqdiri penaltilar seriyasida hal bo‘ldi. Ushbu dramatik pallada “SSKA” futbolchilari sovuqqonlik va aniqlikni namoyon etishdi. Penaltida 4:3 hisobida g‘alaba qozongan armiyachilar Rossiya kubogini o‘z kolleksiyalariga qo‘shib qo‘yishdi.

Bu g‘alaba SSKA tarixidagi to‘qqizinchi Rossiya kubogi bo‘lib, jamoa bu ko‘rsatkichda Moskvaning yana bir klubi — “Lokomotiv” bilan tenglashdi.

Abbosbek Fayzullayev uchun esa bu kubok Rossiyadagi faoliyatidagi muhim marralardan biri hisoblanadi. Uning finalda ishtirok etishi o‘zbek futbolchilari xalqaro arenalarda munosib o‘yin ko‘rsata olayotganining yana bir isbotidir.

Zamin.uz tahririyati Abbosbek Fayzullayevni va uning jamoasini ushbu muhim g‘alaba bilan muborakbod etadi!