Olmaota shahrida bo‘lib o‘tgan “Asia Auto Gymkhana Championship 2025” musobaqasining birinchi bosqichi O‘zbekiston avtosport jamoasi uchun yorqin va yuksak natijalar bilan boshlandi. Mamlakatimiz sharafini himoya qilgan NAFKU jamoasi musobaqaning dastlabki bosqichida kuchli jamoalar qatoridan joy egallab, xalqaro arenalarda o‘zini munosib namoyon etmoqda.
Dilshod Yusupov – saralashdagi porloq natija
Musobaqaning mashg‘ulot qismida Dilshod Yusupov eng yaxshi vaqtni qayd etib, saralash bosqichida ikkinchi o‘rinni egalladi. Bu natija uning yuqori darajadagi mahorat va tayyorgarligidan dalolat berdi.
Juftlik bahsida kumush medal
Juftlik bahslari yana-da qizg‘in tarzda o‘tdi. Dilshod Yusupov va Alim Ahmadjonov dueti yuqori tezlik, aniq harakatlar va mukammal muvofiqlik bilan katta taassurot qoldirdi. Ular erkaklar juftlik bahsida kuchli raqiblar orasida kumush medalga sazovor bo‘ldi. Bu esa jamoaviy reytingdagi yuqori o‘ringa yo‘l ochdi.
O‘zbekiston – umumjamoa hisobida ikkinchi
Birinchi bosqich yakunlariga ko‘ra, O‘zbekiston umumjamoa hisobida ikkinchi o‘rinni egallab turibdi. Bu natija – nafaqat pilotlar, balki butun murabbiylar shtabi va avtosport ishqibozlari uchun ham g‘urur tuyg‘usini ulashmoqda.
Final Toshkentda bo‘lib o‘tadi
Oldinda chempionatning yana to‘rtta bosqichi qoldi. Ularning har biri xalqaro sport maydonlarida — Shri-Lanka, Hindiston va Taypeyda o‘tkaziladi. Eng qizig‘i va tarixiy jihatdan muhim final bosqichiga esa O‘zbekiston mezbonlik qiladi. Bu o‘z navbatida nafaqat yurtimizda avtosportga bo‘lgan qiziqishni yana-da oshiradi, balki mamlakatimiz nufuzini xalqaro maydonda yana-da mustahkamlaydi.
Avtomotosportning bu ko‘rinishi nafaqat texnik mahorat, balki strategiya va jamoaviy harakatni talab qiladi. NAFKU jamoasi birinchi bosqichdagi muvaffaqiyatlari bilan o‘zini jiddiy raqib sifatida ko‘rsata oldi. Ularga kelasi bosqichlarda ham omad va yana-da yuqori natijalar tilaymiz!
