2026 yilgi Jahon chempionati saralash bosqichi 9-turidan o‘rin olgan BAA – O‘zbekiston uchrashuvi arafasida ikki jamoa rasmiylari ishtirokida rasmiy texnik uchrashuv bo‘lib o‘tdi. Mazkur yig‘ilishda OFK vakillari hamda mahalliy tashkiliy qo‘mita a’zolari ishtirok etdi, deb xabar bermoqda Zamin.uz muxbiri Abu-Dabidan.
Uchrashuv chog‘ida ikki jamoa vakillariga o‘yin bilan bog‘liq bir qator muhim masalalar yuzasidan rasmiy tushuntirishlar berildi. Xususan, marketing qoidalari, tibbiy yordam va xavfsizlik tizimlariga oid ma’lumotlar keng muhokama qilindi.
Forma va rangi ham aniq bo‘ldi
O‘zbekiston terma jamoasi ushbu bellashuvda to‘liq ko‘k rangdagi asosiy libosda harakat qiladigan bo‘ldi. Darvozabon esa yashil rangli formada maydonga tushadi. Ushbu qaror OFK qoidalariga muvofiq ravishda, har ikki jamoa formasining farqli bo‘lishi talabidan kelib chiqib qabul qilindi.
Qayd etish joizki, bu kabi texnik uchrashuvlar har bir xalqaro o‘yin oldidan o‘tkaziladi va unda ishtirokchi jamoalarning to‘liq tashkiliy tayyorgarligi nazorat qilinadi. Unda forma rangidan tortib, banderollar, rasmiylar o‘rni va hatto tibbiy xizmat ko‘rsatuvchilarning joylashuvigacha aniqlanadi.
O‘zbekiston milliy terma jamoasi BAAga qarshi muhim bahs oldidan nafaqat taktik, balki tashkiliy jihatdan ham to‘liq tayyorgarlikni namoyon etmoqda. Endilikda e’tiborning markazida faqat bir narsa bor — maydondagi harakat va tarixiy yo‘llanma uchun kurash.
Bizning “oq bo‘rilar” — ko‘k libosda, bir butun xalqning ishonchi va duosi bilan maydonga chiqishadi.
