Terma jamoa mehmonxonasidagi tekshiruvga rasmiy izoh berildi
Jahon chempionati saralash bahslari arafasida O‘zbekiston milliy terma jamoasi joylashgan mehmonxonaga doping ofitserlarining tashrifi keng muhokamalarga sabab bo‘ldi. Mavjud savollarga aniqlik kiritish maqsadida O‘zbekiston Futbol Assotsiatsiyasi "Tibbiy qo‘mita"si raisi, shuningdek “Lokomotiv” PFK bosh shifokori Abror Pirriyev rasmiy izoh berdi.
Uning taʼkidlashicha, bunday tekshiruvlar xalqaro futbolda odatiy va reglamentlashtirilgan amaliyot hisoblanadi. Saralash kabi muhim musobaqalar arafasida doping nazorati FIFA talablaridan biri bo‘lib, uni amalga oshirish Osiyo futbol konfederatsiyasi — OFKning zimmasidadir.
Muhim uchrashuvlar arafasida — kutilgan tekshiruv
Pirriyevga ko‘ra, bunday sinovlar futboldagi halol raqobat, professional etika va musobaqa shaffofligini taʼminlash uchun joriy etilgan. Uning so‘zlariga ko‘ra, nafaqat o‘yin payti, balki tayyorgarlik jarayonlarida ham qo‘qqisdan tekshiruvlar o‘tkazilishi xalqaro tajribadan kelib chiqadigan amaliyotdir.
“Shaxsan men o‘zim FIFA va OFK tomonidan tayinlangan doping ofitseri sifatida bir necha bor shunday jarayonlarda ishtirok etganman. Bu o‘yinchining sog‘ligi, odil raqobat va musobaqa qoidalarini kafolatlashga xizmat qiladi,” – dedi Abror Pirriyev.
Asossiz gaplarga eʼtibor qilmaslik kerak
Pirriyevning taʼkidlashicha, sport atrofida turli shov-shuv va gumonlarga asoslangan gap-so‘zlar bo‘lishi tabiiy. Ammo eng to‘g‘ri yondashuv — barcha eʼtiborni va hissiyotni stadiondagi harakatlarga, futbolchilarni qo‘llab-quvvatlashga yo‘naltirishdir.
"Hozirgi paytda futbolchilarimiz oldida juda katta masʼuliyat turibdi. Bunday vaziyatda eng yaxshi yordam — ularga ishonch, ko‘mak va ijobiy ruhiy muhit bo‘ladi. Shunga ko‘ra, biz ham barcha muxlislar kabi jamoamizning yonida bo‘lib, ularni maydonda ruhlantirishimiz kerak," — deya qayd etdi mutaxassis.
Xulosa: nazorat — adolat va shaffoflik garovi
Milliy terma jamoamiz jahon chempionati finaliga chiqish uchun juda muhim pallaga yetib kelgan bir paytda, doping tekshiruvlari kabi rasmiy amaliyotlarni shubha bilan qabul qilish o‘rinsiz. Bu — futboldagi shaffoflikni taʼminlashga qaratilgan xalqaro talabdir.
Qolaversa, har qanday shubhali xabarlar o‘rniga, yurakdan kelgan qo‘llab-quvvatlash milliy jamoamiz uchun eng muhim omil bo‘lishi turgan gap. Maydondagi halol kurashga ishonaylik va terma jamoamizga ishonch bildirishda davom etaylik.
