Tarixiy zafar: FIFA prezidenti Shavkat Mirziyoyevni samimiy tabrikladi
Futbol assotsiatsiyalari xalqaro federatsiyasi (FIFA) prezidenti Janni Infantino O‘zbekiston Respublikasi Prezidenti Shavkat Mirziyoyevga samimiy va hurmatli tabrik maktubini yo‘lladi. Ushbu tabrik O‘zbekiston milliy terma jamoasining tarixida ilk bor Jahon chempionatiga yo‘llanma olgani munosabati bilan e’lon qilindi.
Janni Infantino o‘z maktubida O‘zbekiston terma jamoasining kecha Osiyo mintaqasida birinchi bo‘lib 2026 yilda AQSH, Kanada va Meksikada bo‘lib o‘tadigan FIFA Jahon chempionati yo‘llanmasini qo‘lga kiritganligini alohida e’tirof etdi.
FIFA prezidenti o‘z maktubida quyidagi so‘zlarni yozgan:
“Janobi Oliylari, hurmatli Prezident! Kecha O‘zbekiston futboli o‘zining boy tarixida ilk bor FIFA Jahon chempionatida ishtirok etish huquqini qo‘lga kiritdi. Ushbu zafar bilan O‘zbekiston Osiyodagi eng birinchi jamoalardan biri bo‘lib, jahon maydonida o‘z o‘rnini egallash uchun munosib yo‘llanmaga ega bo‘ldi.
Ushbu ajoyib va mislsiz natija bilan butun futbol dunyosi nomidan Sizni shaxsan hamda barcha o‘zbekistonlik muxlislarni qalbimdan samimiy tabriklayman. Terma jamoangizning bu muvaffaqiyati faqatgina futbolchilarning emas, balki hukumatingiz, O‘zbekiston futbol assotsiatsiyasi, terma jamoa bosh murabbiyi, klublar rahbariyati, ishchi-xodimlar va albatta har bir o‘yinda o‘z sevimli jamoasiga katta ishtiyoq bilan qo‘llab-quvvatlagan millionlab muxlislarning birdamligi va harakatlari natijasi ekanini alohida ta’kidlayman.
Bu tarixiy g‘alabaning qo‘lga kiritilishi butun O‘zbekistondagi futbol taraqqiyoti uchun ham, kelajak avlodlarning futbolga bo‘lgan qiziqishi va ishonchi oshishi uchun ham nihoyatda muhim ahamiyat kasb etadi. Ushbu zafarni qo‘lga kiritish uchun O‘zbekiston milliy jamoasi ko‘plab bosqichlarda, og‘ir va keskin raqobatlarda jahon chempionatiga borish huquqini qo‘lga kiritishga sazovor ekanini isbotladi. Bu muvaffaqiyat mamlakat futbolida yangi bir davr ochilishidan dalolat beradi.
Sizning rahbarligingiz ostida O‘zbekiston futboli nafaqat Osiyo, balki xalqaro miqyosda ham sezilarli darajada rivojlanib, dunyo futbolining ajralmas bir qismiga aylanib borayotgani bizni quvontirmoqda. FIFA hamisha O‘zbekistonning futbol sohasidagi sa’y-harakatlarini qo‘llab-quvvatlashga tayyordir.
Hurmatli Prezident, yana bir bor Siz va butun o‘zbek xalqiga 2026 yilgi Jahon chempionatida ulug‘vor natijalar tilayman. Bu yirik xalqaro musobaqada O‘zbekiston terma jamoasi munosib o‘rin egallashiga tilakdoshman. Shuningdek, Janobi Oliylari, Siz bilan yana bir bor uchrashish imkoniyati paydo bo‘lishini chin dildan orziqib kutaman”.
FIFA rahbarining mazkur tabrigi butun O‘zbekiston xalqi uchun yana bir bor g‘urur va mamnuniyat manbai bo‘ldi.
O‘zbekiston milliy jamoasi 5 iyun kuni Jahon chempionati saralashi 9-turida BAA bilan 0:0 hisobida durang o‘ynab, mundial yo‘llanmasiga ega chiqdi. Bu O‘zbekiston tarixidagi ilk jahon chempionati bo‘ladi. Shu kunning o‘zida Shavkat Mirziyoyev futbol bo‘yicha O‘zbekiston milliy jamoasi bosh murabbiyi Timur Kapadzega qo‘ng‘iroq qilib, o‘z tarixida ilk bor Jahon chempionati yo‘llanmasini qo‘lga kiritgan futbolchilarga tabrik yo‘lladi. Shuningdek, FIFA prezidenti Janni Infantino ham o‘zbekistonlik futbolchilarni tabrikladi.
