Futbol olamida yangi yulduz porlamoqda – Ispaniya terma jamoasi va «Barselona» klubining 17 yoshli hujumkor yarim himoyachisi Lamin Yamal yana bir tarixiy natijaga erishdi. UYEFA Millatlar ligasining yarim finali doirasida Fransiya terma jamoasi bilan kechgan shiddatli uchrashuvda ispanlar raqiblarini 5:4 hisobida yengib, finalga yo‘l oldi. Bu tarixiy kechada ikki golga mualliflik qilgan Yamal yana bir rekordni o‘z nomiga yozdirib qo‘ydi.
Lamin Yamal 18 yoshga to‘lmasdan turib, Fransiya terma jamoasi darvozasini umumiy hisobda uch marta ishg‘ol qilgan ikkinchi futbolchi sifatida tarixga kirdi. Ilk bor u fransuzlarning darvozasini o‘tgan yili yozdagi yoshlar o‘rtasidagi Yevropa chempionati yarim finalida nishonga olgan va jamoasining 2:1 hisobidagi muhim g‘alabasini ta’minlagan edi.
Yaqindagi Fransiyaga qarshi o‘yindagi ikki goli esa uni butun futbol olami diqqat-markaziga aylantirdi. Shu tariqa, Yamalning Fransiya darvozasiga kiritgan gollari soni uchtaga yetdi va u aynan mashhur Pelening rekordini takrorlashga muvaffaq bo‘ldi.
Ma’lumot uchun, bunga qadar tarixda faqat bittagina futbolchi – afsonaviy Pele 18 yoshgacha bo‘lgan yoshida Fransiya termasi darvozasiga uchta gol urgan edi. Keyinchalik butun futbol olami tomonidan «Futbol qiroli» deb e’tirof etilgan Pele bu rekordni 1958 yili Shvetsiyada o‘tkazilgan jahon chempionati yarim finalida qayd etgan va o‘sha bahsda xet-trikka erishgan edi.
Shunday qilib, ispaniyalik yosh yulduz nafaqat o‘z mamlakati, balki butun futbol dunyosidagi yangi rekordlar bilan o‘z nomini tarannum ettirmoqda. Uning tezligi, texnik mahorati va gol urish qobiliyati futbol mutaxassislari tomonidan yuqori baholanmoqda. Ispaniyalik muxlislar esa uning kelajakda butun dunyoning eng yaxshi futbolchilaridan biri bo‘lishiga ishonch bildirmoqda.
Lamin Yamal 2007 yilning 13 iyul kunida tug‘ilgan va u yaqinda 18 yoshga to‘ladi. Qisqa vaqt ichida butun dunyo e’tiborini o‘ziga qaratgan futbolchi, ayniqsa, «Barselona» klubi tomonidan katta ishonch bilan asosiy tarkibga jalb qilinmoqda. Joriy mavsumda ham klub va milliy terma jamoa tarkibida muntazam ravishda maydonga tushib, muhim va hal qiluvchi o‘yinlarda o‘z hissasini qo‘shib kelmoqda.
Bu natijalar uning nafaqat klub darajasida, balki milliy terma jamoa darajasida ham allaqachon yetakchilardan biriga aylanayotganidan dalolatdir. Ushbu yosh futbolchining kelajakdagi imkoniyatlari va salohiyati juda katta ekanligini ko‘plab ekspertlar ta’kidlamoqda.
Lamin Yamalning bu kabi rekordlarga erishishi yosh futbolchilarga katta ilhom berib, Ispaniya futbolining yanada rivojlanishiga xizmat qilishi tabiiy. Ispaniya futbolida paydo bo‘layotgan bu kabi yangi yulduzlar futbol muxlislarining ham zavq-shavqini oshirib, yosh avlod orasida futbolga bo‘lgan qiziqishni yanada kuchaytiradi.
Muxlislar esa Ispaniya terma jamoasining finalda ham g‘alaba qozonib, ushbu yosh yulduz boshchiligida yangi tarix yozishiga umid qilmoqda. Lamin Yamal esa, shubhasiz, bu yo‘ldagi asosiy yetakchilardan biri sifatida e’tibor markazida bo‘lib qolaveradi.
