Yaqinda Shusha shahrida o‘tgan media forumda Ozarbayjon prezidenti Ilhom Aliyev tarixiy nutq so‘zladi. Bu haqida Zamin.uz xabar berdi.
Unga ukrainaliklarga hududiy yaxlitlikni tiklash borasida qanday maslahat berishi so‘raldi. Aliyevning javobi nafaqat Ozarbayjon, balki bosqinchilikdan aziyat chekkan barcha millatlar uchun muhim signal bo‘ldi.
Davlat rahbari birinchi navbatda hech qachon bosqinni qabul qilmaslik kerakligini ta’kidladi. Uning aytishicha, aynan shu qaror Ozarbayjonga qiyin davrlarni yengib o‘tishda kuch va sabr berdi.
“Bu, menimcha, ukrainaliklarning intilishlariga mos keladi. Bosqinni hech qachon qabul qilmang.
Bu asosiy maslahat. Biz ham shunday qildik”, dedi u.
Aliyev mamlakat tarixiga oid og‘ir voqealarni eslatib o‘tdi. Qarabog‘ urushidan keyingi og‘ir oqibatlar, millionga yaqin qochqin, iqtisodiy qiyinchiliklar va xalqaro yordamning deyarli berilmaganini qayd etdi.
Unga ko‘ra, iqtisodiy tomondan bir milliondan ortiq odam tirikchilik vositasidan mahrum bo‘lgan, 700 mingdan ziyod ozarbayjonlik Qorabog‘ mintaqasidan qochib ketgan, shuningdek, Armanistonda yashagan 250 mingdan ortiq ozarbayjonlik deportatsiya qilingan. Prezident mamlakat va jamiyat birdamligini muhim omil sifatida ta’kidladi.
Uning fikricha, xalqning Prezident va bosh qo‘mondonga bo‘lgan ishonchi Ozarbayjonni buyuk g‘alabaga yetaklagan. Bu birlik hududiy yaxlitlikni tiklash yo‘lida eng katta kuch bo‘ldi.
“Biz asta-sekin oyoqqa turib, rivojlandik va faqat bitta maqsadni ko‘zladik. Ishonchim komilki, fuqarolarimizning katta qismi mening so‘zlarimga qo‘shiladi.
Biz bosib olingan hududni qaytarish haqida o‘yladik. Bu juda qiyin bo‘lishini tushundik”, dedi Aliyev.
Shuningdek, u OSCE Minsk guruhi faoliyatidagi adolatsizlik va status-kvoni saqlab qolish harakatlariga ham to‘xtaldi. Aliyevning so‘zlariga ko‘ra, Ozarbayjon ko‘plab to‘siqlarga qaramay, 2020 yilda mustaqil qaror qabul qilib, tarixiy adolatni tiklash uchun amaliy choralarni boshlagan va 2023 yilda masalani bir kunda hal qilgan.
Nutqining yakunida Ilhom Aliyev o‘z hayot tajribasi va mamlakat tarixi asosida hech qachon taslim bo‘lmaslik, hududiy yaxlitlikdan voz kechmaslik va jamiyat birdamligiga tayanish eng muhim omillar ekanini yana bir bor ta’kidladi. U urushlar faqat bir tomon taslim bo‘lganda tugashini, sulh esa kuch to‘plash uchun vaqt berishini eslatdi.
“Jamiyatning birdamligi menga prezident va bosh qo‘mondon sifatida kuch berdi. Men xalqning meni qo‘llab-quvvatlashiga ishonardim.
Bu, ehtimol, hal qiluvchi omil bo‘ldi. Shunday qilib, yana takrorlayman: hech qachon taslim bo‘lmang”, dedi Aliyev.
Ushbu nutq mustaqillikka intilayotgan, sabr va birlikdan kuch oladigan xalqlar uchun katta ilhom va umid manbai bo‘lib qoladi.
