Yaponiya va Xitoy o‘rtasidagi ziddiyat kuchaymoqda

Yaponiya hukumati Xitoyda yashayotgan fuqarolariga xavfsizlik choralariga rioya qilish va odamlar gavjum bo‘ladigan joylardan uzoqlashishni tavsiya qildi. Bu haqda Zamin.uz xabar berdi.

Ushbu ogohlantirish Yaponiya bosh vaziri Sanae Takaichining Xitoyning Tayvanga ehtimoliy hujumi Yaponiyaning xavfsizligiga tahdid solishi va bunga harbiy javob berilishi mumkinligi haqidagi bayonotidan so‘ng e’lon qilindi. Mazkur bayonot Tokiyo va Pekin o‘rtasida diplomatik munosabatlarning yanada keskinlashishiga olib keldi.

Xitoy hukumati Yaponiya bosh vaziridan bu so‘zlarini qaytarishni talab qildi. Biroq Yaponiya hukumati o‘z pozitsiyasida qat’iy turib, Tayvan masalasi tinch yo‘l bilan hal qilinishi lozimligini ta’kidladi.

Vaziyatning keskinlashuvi fonida Xitoy o‘z fuqarolariga Yaponiyaga safar qilishdan tiyilishni tavsiya qildi. Shu sababli sayyohlik kompaniyalari Yaponiyaga parvozlarni bekor qilmoqda va chipta pullarini qaytarib bermoqda.

Bundan tashqari, Xitoyda yapon filmlarining namoyishi ham to‘xtatildi. Bu holat Yaponiya turizmi va iqtisodiyotiga jiddiy zarar yetkazmoqda, chunki Xitoy sayyohlari mamlakatga keladigan xorijiy sayyohlarning sezilarli qismini tashkil etadi.

Xitoy kemalarining Senkaku orollari atrofidagi bahsli suv hududlariga kirishi vaziyatni yanada murakkablashtirdi. AQSh esa Yaponiyani ittifoq shartnomasiga muvofiq himoya qilishga tayyorligini ma’lum qildi.

Shu tariqa, mintaqadagi siyosiy va harbiy keskinlik davom etmoqda.