Turkiya markazida 15 iyun kuni sodir bo‘lgan qayg‘uli hodisa mamlakat va xalqaro sayyohlar jamoatchiligini larzaga soldi. Oqsaroy viloyatining Gozlukuyu qishlog‘i yaqinida sayyohlarni olib uchgan havo shari qulagan. Hodisa natijasida uni boshqargan uchuvchi halok bo‘lgan, 19 nafar indoneziyalik va 12 nafar hindistonlik sayyoh turli darajada tan jarohati olgan.
Ma’lum qilinishicha, sharning qulashiga kuchli shamolning to‘satdan yo‘nalishini o‘zgartirishi sabab bo‘lgan. Uchuvchi qo‘nish paytida havo shar savatidan tushib ketgan va oyoqlari arqonga ilinib qolgan. Natijada, u savat ostiga tushib qolib, og‘ir tan jarohatlari tufayli voqea joyida jon bergan.
Jarohatlangan sayyohlar tez tibbiy yordam mashinalarida yaqin atrofdagi shifoxonalarga yetkazildi. Turkiya rasmiylari holat yuzasidan rasmiy surishtiruv boshlagani va xavfsizlik choralari qayta ko‘rib chiqilishini ma’lum qildi.
Bundan tashqari, Anadolu agentligi ma’lumotlariga ko‘ra, Ilxara vodiysida ham shu kuni tongda boshqa bir havo shari muvozanatni yo‘qotgan holda qo‘ngan. Undagi 12 nafar hind sayyoh yengil jarohatlar bilan shifoxonaga olib ketilgan.
Xotirlatib o‘tamiz, 2022 yilda ham shunga o‘xshash fojea sodir bo‘lgan — Kappadokiyada ikki ispaniyalik sayyoh sharning qattiq qo‘nishi oqibatida halok bo‘lgandi. Ushbu hodisalar havo sharlari sayyohlik turizmidagi xavfsizlik talablarini yana bir bor jiddiy ko‘rib chiqish zarurligini ko‘rsatmoqda.
Turkiyaning Kappadokiya va Ilxara vodiysi kabi hududlarida havo sharlarida sayyohlik allaqachon ommaviy ko‘rinishga aylangan. Tabiiy go‘zalliklar ustidan osmonda sayr qilishni orzu qilgan minglab sayyohlar har yili ushbu turizm faoliyatida ishtirok etishadi. Ammo so‘nggi yillarda kuzatilayotgan texnik nosozliklar va ob-havo omillarining yetarlicha nazorat qilinmayotgani bu sohada xavfsizlikni kuchaytirish talabini yanada dolzarblashtirmoqda.
Turkiyaning mutasaddi idoralari hozirda tergov ishlarini olib bormoqda. Shu bilan birga, sayyohlar xavfsizligini ta’minlash uchun yangi protokollar va texnik reglamentlar joriy etilishi kutilmoqda.
