Turkiyada Usmon Azim haqida ilmiy kitob nashr etildi
Turkiyada o‘zbek shoiri Usmon Azim haqida ilmiy kitob nashr etildi. Bu haqda Zamin.uz xabar berdi.
Bu haqda asar muallifi, turk shoiri va adabiyotshunosi Fotih Sulton Yilmaz o‘zining ijtimoiy tarmoqdagi sahifasida ma’lum qildi. Yilmazning "O‘zbek adabiyotining bir fidoiysi: Usmon Azim (davr, shaxsiyat, asar)" nomli ilmiy kitobi shoirning 75 yilligi munosabati bilan chop etildi.
Kitob uch bobdan iborat bo‘lib, birinchi va uchinchi boblarning muallifi Fotih Sulton Yilmazdir. Birinchi bobda Usmon Azimning adabiy portreti, ijodiy yo‘li va uning asarlaridagi g‘oyaviy yo‘nalishlar ilmiy uslubda tahlil qilinadi.
Ikkinchi bobda o‘zbek va turk adabiyotshunoslari tomonidan yozilgan maqolalar jamlangan. Ushbu maqolalar turk tiliga tarjima qilingan bo‘lib, turk o‘quvchilari uchun mo‘ljallangan.
Uchinchi bobda esa muallif Toshkentda Usmon Azim bilan o‘tkazgan suhbatni keltiradi. Bu suhbatda shoirning turk va jahon adabiyotiga oid ilgari e’lon qilinmagan fikr va mulohazalari mavjud.
Fotih Sulton Yilmaz o‘z asarida nafaqat shoir ijodini, balki uning ichki dunyosini ham ochib beradi. Yilmazning ta’kidlashicha, bu kitob turk dunyosi adabiyoti uchun foydali bo‘ladi.
Shuningdek, u Usmon Azim she’rlarining turk tilidagi tarjimalarini "Sessızce oturdum dünya içinde" nomli alohida kitob sifatida "Bengü" nashriyotida nashr etdi. Ushbu to‘plamda shoirning ilk ijodiy davridan boshlab so‘nggi asarlargacha bo‘lgan she’rlari jamlangan.
Fotih Sulton Yilmaz 1995 yilda Trabzonda tug‘ilgan bo‘lib, turkiy xalqlar adabiyoti bo‘yicha tadqiqotlar olib boradi. U Abay Qo‘nanboyev haqida ham ilmiy asarlar yaratgan va o‘zbek, qozoq, qirg‘iz hamda ozarbayjon shoirlarining ko‘plab she’rlarini turk tiliga tarjima qilgan.
Usmon Azim zamonaviy o‘zbek poeziyasining yirik namoyandalaridan biridir. Uning "Holat", "Oqibat", "Ko‘zgu", "Jodu", "So‘ngso‘zlar" kabi asarlari o‘zbek adabiyotida chuqur iz qoldirgan.
Shoir 1998 yilda "Do‘stlik" ordeni bilan taqdirlangan va 3000 ga yaqin she’r muallifi hisoblanadi.
