Manchester Siti klubi hujumkor yarim himoyachisi Jek Grilish “Napoli” klubi transfer maqsadlaridan biri hisoblanadi. Bu haqida Euro-football.ru xabar berdi.
Italiyaning amaldagi chempionlari dastlab Bolonya safida to‘p surayotgan Dan Ndoeni tarkibga qo‘shib olishni rejalashtirishgan edi, biroq tomonlar transfer borasida kelisha olishmadi. Shu sababli, Neapol klubi endi Jek Grilishga e’tibor qaratishi mumkin.
Bu haqda Italiya matbuoti xabar bermoqda. Manchester Siti klubi 29 yoshli futbolchi uchun taxminan 45 million yevro talab qilmoqda.
Biroq, klublar Grilishni avvaliga ijaraga olib, keyinchalik to‘liq sotib olish imkoniyatini ko‘rib chiqishlari ehtimoli bor. Angliyalik futbolchi o‘zi uchun taklif etilayotgan transferga ijobiy munosabat bildirgan va kerak bo‘lsa, maoshini kamaytirishga ham tayyorligini bildirgan.
Agar Jek Grilish “Napoli”ga o‘tsa, u yerda Manchester Siti safida birga o‘ynagan Kevin De Bryuyne bilan yana birga harakat qilishi mumkin. Bu esa klub uchun ham, futbolchining o‘zi uchun ham yangi imkoniyatlar ochadi.
“Napoli” rahbariyati Grilishning tajribasi va mahoratiga katta umid qilmoqda.
