Milan Dushan Vlahovich transferini muhokama qilishda davom etmoqda

“Milan” klubi hali ham “Yuventus” hujumchisi Dushan Vlahovichni o‘z safiga qo‘shishni rejalashtirmoqda. Bu haqida Euro-football.ru xabar berdi.

Klub vakillari bir necha haftadan buyon serbiyalik futbolchini tarkibga qo‘shish ustida ishlamoqda va uning agentlari bilan doimiy aloqada bo‘lib kelmoqda. Biroq, ushbu kelishuvni amalga oshirish oson bo‘lmaydi, chunki Dushan Vlahovichning maoshi Italiya chempionati mezonlariga nisbatan juda yuqori hisoblanadi.

Shunga qaramay, taniqli jurnalist Matteo Moretto bergan ma’lumotga ko‘ra, “Milan” rahbariyati muzokaralarda shoshilmayapti va kelishuv muvaffaqiyatli yakunlanishiga ishonmoqda. “Yuventus” esa bu yozda Dushan Vlahovich bilan xayrlashishni rejalashtirmoqda.

Sababi, uning joriy shartnomasi kelasi yil yakuniga yetadi va yangi shartnoma borasida kelishuvga erishilmadi. 25 yoshli futbolchi “Milan”da bosh murabbiy Massimiliano Allegri bilan yana birga ishlash imkoniyatiga ega bo‘lishi mumkin.

Ular avval “Yuventus”da birga faoliyat yuritgan. Shu bois, Vlahovichning “Milan”ga o‘tishi har ikki tomon uchun ham foydali bo‘lishi mumkin.

Hozircha muzokaralar davom etmoqda.