“Atletiko” muxlislari va chipta savdosida rekord o‘rnatdi

Madridning "Atletiko" futbol klubi bosh direktori Migel Anxel Xil klub so‘nggi mavsumlarda sovrinlarga erisha olmaganiga qaramay, jamoa rivojlanishda davom etayotganini ta’kidladi. Bu haqida Euro-football.ru xabar berdi.

"Atletiko" oxirgi bor 2021 yilda Ispaniya chempionligini qo‘lga kiritgan. Bu klubning hozirgacha erishgan eng so‘nggi yutug‘i hisoblanadi.

Migel Anxel Xilning so‘zlariga ko‘ra, klub so‘nggi yillarda muxlislar soni va chipta savdosida tarixiy natijalarga erishmoqda. Uning ta’kidlashicha, klub obunachilar soni, ijtimoiy tarmoqlardagi kuzatuvchilari va sotilgan chiptalar bo‘yicha o‘z rekordini yangiladi.

Bu esa jamoaning mashhurligi va iqtisodiy holati mustahkamlanayotganini ko‘rsatadi. Yangi mavsum esa "Atletiko" uchun 17-avgust kuni boshlanadi.

Shu kuni Madrid klubi "Espanol" jamoasiga qarshi maydonga tushadi. Klub rahbari jamoaning oldinga harakat qilayotgani va muxlislar sonining ortishi kelajakda katta natijalarga erishish uchun muhim omil bo‘lishini qayd etdi.

"Atletiko" rahbariyati jamoa taraqqiyotiga ishonch bildirgan.