«Manchester Yunayted» futbolchisi Alejandro Garnacho faoliyatini «Chelsi»da davom ettirishi mumkin. Bu haqida Euro-football.ru xabar berdi.
Klub bosh murabbiyi Ruben Amorim argentinalik futbolchiga ishonch bildirmayotgani sababli, futbolchi yoz fasli yakuniga qadar jamoani tark etishi kutilmoqda. Mashhur futbol yangiliklari manbasi Fabrizio Romano ma’lumotiga ko‘ra, Garnacho «Chelsi»da o‘ynashni istaydi.
Uning bu qaroriga asosiy sabab sifatida «Chelsi» klubi Chempionlar ligasida ishtirok etishini ko‘rsatish mumkin. Eslatib o‘tamiz, «Manchester Yunayted» joriy mavsumda Yevropa klublari musobaqalarida qatnashmaydi.
«Chelsi» esa Garnachoni sotib olish imkoniyatini ko‘rib chiqmoqda, biroq bu borada yakuniy qaror klub boshqa transfer ishlarini hal qilgandan keyin qabul qilinadi. Hozirda Transfermarkt internet nashri futbolchining narxini 45 million yevro deb baholamoqda.
Shu bilan birga, Garnachoning «Chelsi»ga o‘tishi bo‘yicha hozircha rasmiy muzokaralar boshlanmagan. Yozgi transfer oynasi davomida ushbu o‘zgarish yuz berishi mumkin.
