Rodrigo hozircha Realni tark etmaydi, kelajagi noaniq

Ispaniyada Rodrigoning Madridning Real jamoasidan ketish ehtimoli baholandi. Bu haqida Euro-football.ru xabar berdi.

Braziliyalik futbolchi muntazam o‘yin amaliyotisiz qolib ketishi mumkin, sababi Xabi Alonso ko‘proq Kilian Mbappe va Vinisius Juniorni asosiy tarkibda ko‘rmoqda. Shunga qaramay, hozircha barcha ma’lumotlarga ko‘ra, Rodrigo transfer oynasi yopilguniga qadar klubni tark etmaydi.

ESPN manbasiga ko‘ra, bir necha hafta oldin 24 yoshli futbolchi Realni tark etish niyati yo‘qligini bildirgan va bugungi kungacha bu borada deyarli hech narsa o‘zgarmagan. Biroq, yoz oxiriga kelib, agar klub munosib taklif olsa, Real Rodrigo bilan xayrlashishi mumkinligi ham istisno etilmayapti.

Yaqinda ommaviy axborot vositalarida Rodrigoning Liverpulga o‘tishga tayyorligi haqida ham xabarlar tarqaldi. Shu bilan birga, hozirgi vaziyatda futbolchining kelajagi klubning transfer siyosatiga va unga bo‘lgan takliflarga bog‘liq bo‘lib qolmoqda.

Real rahbariyati esa har qanday o‘zgarishlarni faqat jamoa manfaatidan kelib chiqib amalga oshirishini ta’kidlamoqda.